भड़ोनी गीत

भड़ोनी गीत
Girls
हरियर हरियर मड़वा म
पीवरा पिवरा हरदी 2
आए हे सुवासा मन हा भर-भरके बरदी।2

Boys
हरियर हरियर मड़वा म
पिवरा पिवरा हरदी 2
आए हे सुवासीन मन हा
धर-धर के हरदी।2
Girls
दिखन लागे टिप – टॉप
मुड़ म हे पागा 2
आधा बरतिया उनडे हावे
शरम नई हे का गा?
Boys
पिंवरा पिंवरा साड़ी म
छुपे हवे छिपकली
इहाके सुवासिन मनके
दांत नोहय असली।
Girls
पीपर पाना के सब्जी
अऊ कोदो के भात हे
भूखमर्रा बाराती मन हा
लार टपकावत आत हे।
Boys
डीजे बाजा बाजत हावे
सुवासीन मन मेछरात हे
देखी देखी मुस्कावत हे
अऊ कनिहा ला मटकावत हे।

रचनाकार
कविराज
संतोष कुमार मिरी
रायपुर छत्तीसगढ़।