#छोरी कालेज़ की – *हरियाणवी गीत*
छोरी कालेज में जावै तू , पर इतणा ना गिरकावै तू।
पड़ जावेंगे छोरे पाछै , न पतली कमर लचकावै तू।।
होठां पै लिपस्टिक लाकै , अंग्रेज़ी कटिंग कटाकै।
काढ़ कालजा लैज्या रै , जब देखै नज़र घुमाकै।
धरती पै पैर टैकले तू , न उड़ती गगन में जावै तू।
पड़ जावेंगे..
छोर्यां नै देख मस्ताणा , हर बात पै यो मुस्काणा।
गज़ब कसूता ढ़ारया सै , फ़ैंसी लुक रोमांटिक बाणा।
रै सिम्पल रहणा सीखले , न रोग विदेशी लगावै तू।
पड़ जावेंगे..
काम तै तू काम राखले , पढ़ण में बस ध्यान राखले।
न बट्टा इज़्जत कै लागै , माँ-बाप का नाम राखले।
यो प्रीतम तनै समझावै , न फ़िल्मी इल्म चलावै तू।
पड़ जावेंगे..
छोरी कालेज में जावै तू , पर इतणा ना गिरकावै तू।
पड़ जावेंगे छोरे पाछै , न पतली कमर लचकावै तू।
#आर.एस.’प्रीतम’
(C)सर्वाधिकार सुरक्षित गीत