“ सतर्कता हटल ,दुर्घटना घटल ”
( यात्रा संस्मरण )
डॉ लक्ष्मण झा “ परिमल ”
=================
ओना भोजन इत्यादि सँ निवृत भ दरभंगा पहूँचैत – पहूँचैत हम दूनू अपन अपन लोअर बर्थ मे सूति रहलहूँ ! बुझल छल जयनगर -राउरकेला ट्रेन जसीडीह जंक्शन 03.05 भोर मे पहुँचत ! हमर आँखि त जमुईये स्टेशन पर 01.00 बजे खुजि गेल छल ! ट्रेन राइट टाइम पर छल ! हमर आशा सुतल छलीह ! मुदा हमर बर्थ लाइट ऑन देखि हुनको नींद नहि भेलनि ! झाझा स्टेशन आबि गेल छल ! एहिठाम सँ जसीडीह जंक्शन आधा घंटाक सफर ! समान दूनू गोटें घसकेनाय शुरू केलहूँ ! आ गेट धरि आनि के रखलहूँ ! गर्म वसात बहि रहल छल ! ताहि पर सँ बाओ टॉइलेट आ बाथरूमक दुर्गंध ! की कारितहूँ जसीडीह जंक्शन पर 2 मिनट जयनगर -राउरकेला ट्रेन रुकैत अछि ! सामानो कम नहि छल !
1.दूटा व्हील एटेची ,
2.एकटा ब्रीफ़ केस जाहि मे हमर लैपटॉप ,
3.एकटा पीठ मे टाँगय वला बैग ,
4एकटा कपड़ा वला बैग ,
5.एकटा खेनाय वला झोरा आ
6.एकटा हमर जूता -चप्पल वला झोरा !
कतबो कंजूसी करू समान भइये जाइत छैक ! दिल्ली गेलहूँ ,दिल्ली मे 12 दिन रहलहूँ ! ओहिठाम सँ मधुबनी गेलहूँ ! साढ़ू क माँझिल पुत्र सुमन क विवाह छल ! दुरागमन भेल ,भड़फोड़ी देखलहूँ आ सत्यनारायण प्रभु क पूजा सम्पन्न केलहूँ ! एहि सब ल केँ समान त भइये जाइत छैक !
गाड़ी निश्चित समय पर जसीडीह 1 नंबर प्लेटफॉर्म आनि देलक ! आब प्रतीक्षा छल “ राँची -दुमका इनर्सिटी ट्रेन “ क ! संयोगवश इ 1 नंबर प्लेटफॉर्म मे अबैत अछि आ इंजिन पुनः पूर्व दिशा दिश लगि जाइत अछि ! इ ट्रेन हमर गंतव्य स्थान दुमका 07.15 पर पहुँचि जाइत अछि ! जसीडीह एहि ट्रेन केँ 05.40. मे पहुंचक छल !
मुदा 05.00. बजे ट्रेन आबि गेल ! एकरो इंजन बदलल गेल ! बैसि गेलहूँ ! समान रखबा मे कोनो असुबिधा नहि भेल ! पूर्व दिशा मे सहो इ प्रस्थान केलक मुदा इ त पुनः राँची दिश जाय लागल ! बहुत यात्रीगण परेशान भेलाह ! दरअसल इ ट्रेन गोड्डा -दुमका -राँची इनर्सिटी ट्रेन छल जे एक नंबर प्लेटफॉर्म पर आयल इंजन बदलि पूर्व दिशा क लेल प्रस्थान केलक ! मुदा दुमका -राँची इनर्सिटी लिखल देखि बहुत लोक भ्रमित भ गेलाह !
बहुत स्टूडेंट्स ,महिला ,पुरुख ,बच्चा -बूची दू स्टेशन मथुरापुर स्टेशन पर अपन ट्रेन बदलि लेलनि ! आशा हमरो परेशान भेलिह ! मुदा ढाढ़स त हुनका देलियनि ! निर्णय केलहूँ मधुपुर स्टेशन मे एहि ट्रेन केँ छोड़ि देब ! ओहिठाम सँ टैक्सी ल लेब आ दुमका चलि जायब !
इ त बुझु नीक छल दू छात्रा के मदद सँ मधुपुर स्टेशन पर उतरलहूँ ! ट्रेनक स्टापिज कम अछि ! देखैत छी इ त 3 नंबर प्लेटफॉर्म अछि ! चारुकात देखलहूँ ,कतो कुली नहि छल ! हिमालय स्वरूप सीढ़ी ! 1 नंबर प्लेटफॉर्म पहुँचि बाहर निकलि सकैत छी ! आधा -आधा समान दूनू व्हील एटेची मे लोड केलहूँ ! एस्कलैटर क सुविधा छल मुदा तत्काल चलि नहि रहल छल ! सी . आर .पी .एफ .जवान सँ मदद क अपेक्षा व्यर्थ भेल ! तथापि वो जवान एकटा सुगम मार्ग बतेलक ! कनि हटि केँ एकटा स्लोप वे छल !
केहुना 1. नंबर प्लेटफॉर्म मे हकमैत पहुँचलहूँ ! एकटा टैक्सी केलहूँ, टैक्सी वला सहो मद्दत केलक ! आ ए.सी .क आनंद लैत दुमका 08.30. पर पहुँचलहूँ ! जान मे जान आयल ! बच्चा सँ पढ़ि रहल छलहूँ “ सतर्कता हटल ,दुर्घटना घटल ”मुदा अनुभव आइ केलहूँ !
=====================
डॉ लक्ष्मण झा “ परिमल “
साउंड हेल्थ क्लिनिक
डॉक्टर’स लेन
दुमका
झारखंड
भारत
27.04.2022.
