“देवभूमि क दिव्य दर्शन” मैथिली ( यात्रा -संस्मरण )

डॉ लक्ष्मण झा ” परिमल ”
===================
01 ,मई 2011 भोरे -भोरे हमर मोबाईल बाजि उठल ! हम उठेलहूँ त हमर पुत्री आभा छलीह ! गप्प भेल ! कुशल समाचार सँ अवगत भेलहूँ ! एहि क्रम मे आभा बजलीह , –
“ बाबू जी ,हमसब प्लान बनेने छी जे चारिधामक यात्रा पर चलि ! हमसब अपन गाड़ी सँ भोरे 05 बजे दिनांक 28 मई 2011 केँ रोहिणी ,नयी दिल्ली सँ चारों धाम क यात्रा पर चलब ! हम चारि गोटें आ आहाँ दूनू हमरा संग चलब ! दिल्ली क लेल आहाँ सब दुमका सँ आरक्षण करबा लिय अन्यथा कोनो दिक्कत हेत त एतय सँ हम करबा देब !”
इ सुअवसर केँ भला कहू के छोड़त ? हम अपन सहमति देत कहलियनि ,—-
“ नऽ….नऽ एहिठाम सँ दिल्ली क लेल आराम सँ आरक्षण भऽ जेतैक !”
दिल्ली सँ हरिद्वार
==============
24 मई 2011 केँ हम दूनू नयी दिल्ली पहुँचि गेलहूँ ! तैयारी प्रारंभ भ’ गेल ! 28 मई 2011 केँ हमरालोकनि केँ चलबाक छल ! पहाड़ी क्षेत्र आ ऊँचाई पर चढ़बाक लेल गर्म कपड़ा आ आवश्यक बस्तु क इंतजाम क लेलहूँ ! ठीक 5 बजे ड्राइवर सरदार हरपाल सिंह INOVA CAR मे बैसा केँ हरिद्वार चलि पड़ल ! सब सँ श्रेष्ठ हमर समधि श्री कृष्ण कान्त झा छलाह ! वो आगाँ बैसि गेलाह ! हम दूनू सेकेंड सीट पर संग मे हमर दोहित्र स्रोत झा, जे मात्र 7 वरख छलाह ,वो हमरे संगे बैसि गेलाह ! रीयर सीट पर हमर जमाय श्री राहुल झा आ हमर पुत्री आभा बैसि गेलीह !
हरिद्वार सँ बरकोट
=============
28 मई 2011 केँ हमरा लोकनि हरिद्वार पहुँचि गेलहूँ ! गंगा स्नान हरकि पौड़ी मे केलहूँ ! 230 किलोमीटर क यात्रा क पश्चात HOTEL PARKVIEW मे एक राति रुकलहूँ ! संध्या समय हरकि पौड़ी मे गंगा- आरती देखबा क अवसर भेटल ! 29 मई प्रातः 6 बजे हरपाल अपन कार मे हमरा लोकनि केँ ल चलल बरकोट क दिसँ ! बरकोट 220 किलोमीटर छल ! देहरादून ,मसूरी आ केंपटी फाल क दर्शन क बाद बरकोट क HOTEL CHAUHAN ANNEXE मे रुकहूँ ! अद्भुत पर्वतीय दृश्य क अवलोकन केलहूँ !
बरकोट सँ यमुनोत्री आ पुनः वापसि
=====================
30 मई 2011 भोरे सब तैयारी क’ केँ पहिल तीर्थ यात्रा प्रारंभ भ गेल ! ओना यमुनोत्री क सफर 36 किलोमीटर क छल आ पहाड़ी ट्रेक एनाय -गेनाय मिला केँ 12 किलोमीटर ! अद्भुत आ रोमांचक पर्वतीय सफर छल ! लागि रहल छल साक्षात स्वर्ग क दर्शन भ रहल अछि ! हरपाल टेप रीकॉर्डर सँ गुरुवाणी सुनैत जा रहल छल ! हमरो सब आनंद उठा रहल छलहूँ ! जानकीचट्टी पर हम सब उतरि गेलहूँ ! हम त अपना लेल खच्चर लेलहूँ आ कृष्णकान्त बाबू सहो एकटा खच्चर लेलनि ! आ राहुल जी ,आभा ,आशा आ स्रोत पैरे ओहि ठाम पहुँचलाह ! पूजा अर्चना आ गर्म कुंड मे स्नान करि पुनः वापस बरकोट आबि गेलहूँ !
बरकोट सँ हरसिल
============
31 मई 2011 केँ हमसब अद्भुत प्रकृति छटा आ सुंदर दृश्य हरसिल मे देखलहूँ ! हरसिल उत्तराखंड क भगरथी गंगा क 2620 मीटर समुद्रतल क सतह सँ ऊपर स्थित छल ! हरसिल क सौदर्य क आनंद लेलहूँ आ ओहि ठामक सुंदर SHIVALIK HOTEL मे एक राति बितैलहूँ !
हरसिल सँ गंगोत्री आ वापस उत्तरकाशी
==========================
01 जून 2011 केँ भोरे हमसब हरसिल सँ चलि पड़लहूँ गंगोत्री क दिसँ ! गंगोत्री मात्र 72 किलोमीटर छल ! गंगोत्री मंदिर जे भागीरथी गंगा क कात मे छल ! पूजा अर्चना केलहूँ आ वापस उत्तरकाशी लंबा यात्रा क पश्चात HOTEL SHIVLINGA मे राति बितैलहूँ !
उत्तरकाशी सँ गुप्तकाशी
================
02 जून 2011 केँ हमसब गुप्तकाशी क दिसँ निकलि पड़लहूँ ! इ यात्रा 220 किलोमीटर क छल परंच एतुका प्राकृतिक दृश्य क सौन्दर्य देखि केँ शरीरक सम्पूर्ण ठेही बुझु बिला गेल ! भरि रास्ता हमरा लोकनि खूब मनोरंजन केलहूँ ! मुदा धारसू क मार्ग मे भूस्खलन भ गेल रहय ! हमर कार कुछु घंटा लेल वाधित भ गेल छल ! कुछु देर क बाद सब ठीक भ गेल आ देखैत -देखैत हमसब गुप्तकाशी पहुँचि गेलहूँ ! एतय होटल नहिं स्नो टेंट लगा केँ अद्भुत होटल बनाओल गेल छल जकरा VIP NIRWANA CAMP नाम सँ लोक जनैत छल ! स्वर्गलोक लागि रहल छल ! हमरा लोकनि तीनटा टेंट ल लेने छलहूँ !
गुप्तकाशी सँ केदार नाथ
==================
03 जून 2011 केँ भोरे CAMP सँ विदा भ निकलि पड़लहूँ ! ओना गुप्तकाशी सँ केदारनाथ क गौरी कुंड 30 किलोमीटर अछि ! फेर गौरीकुंड सँ पैरे खड़ी चड़ाई 14 किलोमीटर चलय पड़ैत अछि ! केदारनाथ 3584 मीटर समुद्रतल सँ ऊपर अछि ! एहिठाम ऑक्सीजन क कमी छैक ! राहुल जी आ हमर पुत्री पैरे केदारनाथ पहुंचलिह ! आशा डोली पर चढ़ि केँ गेलीह ! हम तीनू हेलिकोपटर सँ केदार नाथ पहुँचलहूँ ! पूजा अर्चना हमसब केलहूँ ! राति HOTEL GAYATRI BHAVAN मे ठहरबा क इंतजाम छल ! केदारनाथ 12 ज्योतिर्लिंग मे सँ एक छथि !
केदारनाथ सँ रुद्रप्रयाग
================
04 जून 2011 केँ जहिना केदार नाथ पहुँचल छलहूँ तहिना वापस नीचा आबि फेर गुप्तकाशी होइत हमसब रुद्रप्रयाग क दिसँ चलि पड़लहूँ ! मंदाकिनी आ अलकनंदा नदी क कात मे रुद्रप्रयाग बसल अछि ! ओहि ठामक MONAL RESORT मे रहनाय बुझु मन आनंदित भ गेल !
रुद्रप्रयाग सँ बद्रीनाथ
================
05 जून 2011 केँ हमसब 165 किलोमीटर यात्रा क केँ बद्रीनाथ पहुँचलहूँ ! इ 3133 मीटर समुद्रतल सँ ऊपर अछि आ नर- नारायण पर्वत क शृंखला बद्रीनाथ धाम क प्रहरी बनल अछि ! हमसब HOTEL NARAYAN PALACE मे ठहरलहूँ ! पूजा- अर्चना हमरा लोकनि केलहूँ ! दोसर दिन भोरे -भोरे हमसब MANA VILLAGE क दर्शन केलहूँ ! इ भारतक अंतिम गाँव अछि ! एकरा बाद चीन !
बद्रीनाथ सँ जोशीमठ /पिपलकोटी
=======================
06 जून 2011 भोरे हमर सबारी चलि पड़ल जोशीमठ ! अद्भुत दृश्य ,पहाड़ सँ घिरल आ महापुरुष क मठ सब तरि पसरल छल ! ठामे -ठामे आर्मी कैम्प ,शहर ,बाजार लागल छल ! ठीक 85 किलोमीटर पर पिपलकोटी मे HOTEL LE MEADOWS मे ठहरबा क छल ! जोशीमठ मे सब सुविधा उपलब्ध छल ! प्रत्येक स्थान क लेल बस सर्विस क बंदोबस्त छल !
पिपलकोटी सँ ऋषिकेश
=================
07 जून 2011 केँ ऋषिकेश आबय क छल ! इ यात्रा 8 घंटा क छल ! ड्राइवर हरपाल सिंह एकटा कुशल वाहान चालक सिद्ध भेल ! वो श्रीनगर आ देवप्रयाग क बीच मे हमरा लोकनि केँ गुरुद्वारा ल गेल ! ओतय गुरुग्रंथ साहिब क दर्शन केलहूँ आ लंगर क प्रसाद ग्रहण केलहूँ ! ऋषिकेश मे सहो 5 स्टार HOTEL NARAYANA क इंतजाम छल ! श्रोत आ राहुलजी त स्विमिंग पूल क भरपूर आनंद उठोलनि ! आ एहिना चारो धाम क यात्रा समाप्त क केँ दिल्ली क लेल प्रस्थान केलहूँ !
ऋषिकेश -हरिद्वार सँ दिल्ली
=======================
08 जून 2011 केँ भोरे हमसब हरिद्वार होयत दिल्ली क दिसँ चलि पड़लहूँ ! इ दूरी 250 किलोमीटर छल ! समय 7-8 घंटा लागिये जायत ! हम सब हँसैत -गबैत अपन मंजिल क दिसँ बढ़ल जा रहल छलहूँ ! साँझ भ गेल छल ! दिल्ली क चहलकदमी आ रोशनी क जगमगाहट एक विजय पर्व क एहसास दिया रहल छल ! एहि तरहें चारि – धाम क दिव्य झलक देखबा क भेटल जे आजन्म स्मृति मे घूमैत रहत ! दिव्य देवभूमि केँ सदैव नमन करैत छी !!
=====================
डॉ लक्ष्मण झा ” परिमल ”
साउंड हेल्थ क्लिनिक
एस .पी .कॉलेज रोड
दुमका
झारखंड
भारत
24.08.2023