बिना ज्ञान के जिनगी नरक बा

बिना ज्ञान के जिनगी नरक बा
गीत
सुनीं सभे घुरहू के नारी
करे रोज जाली बनिहारी
रुपिया भले कमाली बाकिर
ज्ञान बिना बाटे लाचारी

लडि़कन के ना तनिक पढा़वें
सबसे मजदूरी करवावें
सुर्ती,बींडी़,मदिरा टानें
बिन गुटखा के तनिक न मानें
बेटी अउर पतोह सभन के
ई सब लकम धरावत बाडी़–ज्ञान बिना बाटे लाचारी

बाहर घूर ठेंठावल जाता
आपन घर नाहीं बहराता
माछिन के भिनकावल जाता
काँचे भात बनावल जाता
आपन काम करें ऊ अइसे
जइसे ई हउवे बेगारी –ज्ञान बिना बाटे लाचारी

उनकर यदि लडि़का पढि़हेसन
अपनो काम सजी करिहेसन
घर,आगँन,सब रहित सफाई
घर भर रोजो लीत नहाई
नसा कइलको छुटि जाइत तब
लक्षमी रहिती डेरा डारी –ज्ञान बिना बाटे लाचारी

अवध किशोर ‘अवधू’
मोबाइल नम्बर 9918854285
दिनांक . 23-11-2025