तीज व्रत हरितालिका(चौपाई)

🙏🙏पावन हरितालिका तीज व्रत के हार्दिक बधाई आ शुभकामना की बातें प्रस्तुत बा कुछ चौपाई–
❤️❤️❤️❤️❤️❤️❤️❤️❤️❤️❤️❤️❤️❤️❤️

तीज कथा के महिमा गायीं।
गउरा जी के ध्यान लगायीं।।
कथा पुराण कहे अनुरागी।
सुनें सुहागिन बनि सौभागी।।१।।

पति के आयु बनायीं लम्बा।
कृपा करें माई जगदम्बा।।
गौरा जी व्रत कइली पावन।
पवली पति आपन मनभावन।।२।।

जप-तप कुल बचपन से कइली।
चिन्ता पिता –मात दे गइली।।
नारद जी बतलावें हरि के।
गौरा घर छोड़े सुनि डरि के।।३।।

कई हजार बरिस तप कइली।
हवा पियत बनपतई खइली।।
गंगा की तीरे पर जाके।
मनली ऊ शिव जी के पा के।।४।।

शिव दर्शन दे कथा सुनायीं।
पूर्वजनम के बाति बतायीं।।
पिता हिमालय जब ई सुनलें।
तब दमाद शंकर के चुनलें।।५।।

बनल तीज तिथि मंगलकारी।
निर्जल व्रत सधवा सुखकारी।।
पति इच्छा में करें कुॅवारी।
पति पावें सुन्नर गुणकारी।।६।।

कथा सपूरन गावत माता।
लागल धेह – नेह से नाता।।
शीश नेवाइ गोड़ हम लागीं।
अटल सुहाग रहे हम माॅंगीं।।७।।

**माया शर्मा, पंचदेवरी, गोपालगंज (बिहार)**