“ सामाजिक समीकरण लुप्त भ रहल अछि “

डॉ लक्ष्मण झा “ परिमल “
================================
फेसबुक मित्रता ( Facebook Friends) सामाजिक समीकरण केँ नहि बदलि सकैत अछि ! इ भ्रांति जे किनको मे व्याप्त छनि ,जे फेसबुक सं जुड़ल छथि ,वो सब मित्र बनि गेलाह ! गूगल अपन सुविधानुसारे Facebook Friends कहि सम्बोधन करैत अछि तें इ नहि बुझि लेबाक चाहि जे सामाजिक समीकरण बदलि गेल !

अपन मात -पिता ,गुरुजन ,श्रेष्ठ ,प्रतिष्ठित लोकनिक सानिध्य केँ हम अपन दोस्त क श्रेणी मे केना आनि सकैत छी ? इ त हुनकर पैघत्व छनि जे वो लोकनि हमरा अपन फेसबुक मे स्थान देलनि ! हमरालोकनि कखनो- कखनो अकर्मण्यता क परिचय देबय लगैत छी ! सामाजिक समीकरण मे यथायोग्य स्थान सब केँ भेटल छैक !

मात -पिता ,गुरुजन ,श्रेष्ठ आ प्रतिष्ठित लोकनि केँ Dear Friend कहि केँ सम्बोधन क सकैत छी ? की गुरुजन केँ “ Keep it up” अथवा “ Carry on” कहि सकैत छी ? की अनाप -सनाप आ माँगल – चाँगल पोस्ट हुनका मैसेंजर पर केनाई उचित ?

हुनका लोकनिक आशीर्वाद चाहि ,शंका क समाधान वो करताह आ हुनक मार्ग दर्शन सं हमरा लोकनि तुंग शिखर पर चढ़ि सकैत छी ! सामाजिक समीकरण मे समतुल्य आ कनिष्ठ सहो अबैत छथि ! हुनको सँगें शालीनता ,शिष्टाचार आ मधुर्यता परिवेश मे संवाद हेबाक चाहि !

इ नहि बुझू आहाँक लेखनी ,पत्र लेखन आ सम्बोधन क प्रतिविम्ब सकारात्मक अ नकारात्मक नहि पड़ैत अछि ! अपन मात -पिता ,गुरुजन ,श्रेष्ठ ,प्रतिष्ठित लोकनिक केँ सम्बोधन उचित रूपेण नहि करबनि ,प्रणाम आ अभिनंदन नहि करबनि त इ बुझल जायत कि हम अशिष्ट छी !

जेना हम अपन मात -पिता केँ “ प्रणाम “ कहैत छी तहिना गुरुजन ,श्रेष्ठ आ प्रतिष्ठित लोकनि केँ शाब्दिक प्रणाम करबाक चाहि ! प्रणाम क GIF फोटो जवाब देनाइ उचित मनल जायत ,मुदा जखन कोनो पत्राचार करैत छी त शाब्दिक “ प्रणाम “ क प्रयोग उत्तम अछि ! अन्यथा हुनकर सानिध्य डगमगा सकैत अछि ! कतबो महान बनि जाऊ मुदा “ सामाजिक समीकरण “ केँ नहि बिसरू !
=====================
डॉ लक्ष्मण झा “ परिमल “
साउन्ड हेल्थ क्लिनिक
एस 0 पी 0 कॉलेज रोड
दुमका
झारखंड
भारत
17. 04. 2022.