बिटिया (ब्रजभाषा रसिया)
🦚
बिटिया
०००००००
बिटिया लगै मात कूँ प्यारी , पितु की राजदुलारी रे ।।
राजदुलारी रे पितु की राजदुलारी रे ।।
०
जा घर में बेटी नाय होवै, लागै सूनौ-सूनौ ,
लाड़ो के भागन भंडारौ, भरै रात दिन दूनौ ,
बाबुल घर तुलसी बिरवा सी , राजकुमारी रे ।
बिटिया लगै मात कूँ प्यारी , पितु की राजदुलारी रे ।।१
०
छम-छम डोलै जब आँगन में अमरत सौ बरसै रे ,
सुन लाली के बैन तोतले, सूखौ मन सरसै रे ,
कन्या देवी अंश नौरता पुजैं कुमारी रे ।
बिटिया लगै मात कूँ प्यारी , पितु की राजदुलारी रे ।।२
०
कहीं उगै जा कहीं रुपै है , चिड़िया सी उड़़ जावै ,
पारी पोसी विदा होय जब रोवै और रुवावै ,
बाबुल सिसकै मैया बिलखै, भर सिसकारी रे ।
बिटिया लगै मात कूँ प्यारी , पितु की राजदुलारी रे ।।३
०
पीहर होय परायौ जब ई जाय सासरे अपने ,
कन्यादान करें हाथन ते , पूरे होवैं सपने ,
महादान कन्या को होवै, अति सुखकारी रे ।
बिटिया लगै मात कूँ प्यारी , पितु की राजदुलारी रे ।।४
०
बेटी-बहन मात रूपा हैं, इनकौ मान करौ रे ,
इज्जत इनकूँ देउ ठीकरी, आँखन नाय धरौ रे ,
बुरी नजर मत तकौ , पाप लागै अति भारी रे ।
बिटिया लगै मात कूँ प्यारी , पितु की राजदुलारी रे ।।५
०
बेटी राधा बेटी सीता , बेटी लछमी मैया ,
बेटी गंगा , बेटी जमना , बेटी सोन चिरैया ,
बेटी तौ घर की गैया सी भोरी-भारी रे ।
बिटिया लगै मात कूँ प्यारी , पितु की राजदुलारी रे ।।६
०००
🦚
महेश जैन ‘ज्योति,
मथुरा ।
***
🪴🪴🪴
