*! ! नंदागे ! !* छत्तीसगढ़ी गीत
! ! नंदागे ! !
सेमी-भाँटा के खोइला नंदागे
लोटा म पानी देवइया नंदागे
कुशियार के बारी, गुड़ बनइया
अउ ढेकी म धान कूटइया नंदागे
लुगरा नंदागे-धोती नंदागे
फ़ीता मुड़ म गथइया नंदागे
साग सिलइया , आगी मंगइया
अउ किस्सा के कहइया नंदागे
घुरवा म कचरा फ़ेकइया नंदागे
राख म बरतन मंजइया नंदागे
धान लुवइया, करपा के बीड़ा बंधइया
अउ गोबर के संइथइया नंदागे
माटी म मुड़ मिसइया नंदागे
गोरंगी म गोड़ रंगइया नंदागे
मोरकोटवा बनइया, गोदरी सिलइया
अउ टेड़ा म पानी पलइया नंदागे
भोजली गीत गवइया नंदागे
मटकी के फ़ोरइया नंदागे
बांसगीत, ददरिया गवइया
अउ नंगमत के झुपइया नंदागे
कुंआ के पानी नंदागे
खपरा के छानी नंदागे
जांता म पिसान पिसइया
अउ खोर के छरा देवइया नंदागे
चिट्ठी के भेजइया नंदागे
बंबरी के झोरइया नंदागे
छुही के बेचइया, ढेरा अंटइया
अउ गोदना के गोदइया नंदागे
?????जय छत्तीसगढ़ महतारी?????
