ऑनलाइन से पढ़ाई

ऑनलाइन से सब भईल जात बा
अब त पढ़ाई रसातल में जात बा,

टीवी मोबाईल पर चेप्टर आ जात बा
घर बईठल पढ़ाई हो जात बा;

खाली फ़ोटो पर फ़ोटो खिंचात बा
डेली रिपोर्ट स्कूल के भेजात बा ;

डायरेक्टर -डीओ के संदेश भेजात बा
एपीओ -डीपीओ से रिपोर्ट मँगात बा ;

अंत में सब काम ,बीओ पर आ जात बा
उपयोगिता में खाली प्रभारी धरात बा ;

कॉपी- क़िताब लइकन के ऑनलाइन मिल जात बा
और पोषाहार के पईसो खाता में आ जात बा ;

ऑनलाइन पढ़के बच्चा स्कूल न जात बा
स्कूल व मास्टर के नाम भूल जात बा ;

देखते – देखत साल बीत जात बा
तुरंते परीक्षा सिर पर आ जात बा ;

जवना के चेप्टर न मालूम उ फ़र्स्ट हो जात बा
गुरु -शिष्य परम्परा अब मिटले जात बा ;

मंगरु कतवारू के लईका पढ़े न आत बा
साइकिल-पोशाक खातींन ऊहो लड़ जात बा ;

पढ़ते-पढ़त कभी लाइन कट जात बा
जिओ-एयरटेल के नेट भाग जात बा ;

मम्मी- पापा के मोबाइल पर नाचों देखात बा
एगो-दूगो अच्छा बाकि सब बिगड़ल जात बा ;

फोने मोबाईल पर बात बढ़ जात बा
कबो कबो झगड़ा के नौबत आ जात बा ;

गंदा लड़ाकू मैसेज ग्रुप में भेजात बा
सौ सवाल के एक हीं बात बा ;

अब त पढ़ाई रसातल में जात बा
ऑनलाइन से…..

नोट- ये मेरे व्यक्तिगत विचार हैं, ऑनलाइन पढ़ाई
का विरोध मेरा मतलब नहीं है .
इनकी खामियां पर एक सूक्ष्म दृष्टि है.