നിശാഗന്ധി.
നിശാഗന്ധി.
************
അധരങ്ങൾ മുറുക്കിച്ചുവപ്പിച്ചു –
മുടിയിലായ് കുടമുല്ലപ്പൂവും ചൂടി.
നെറ്റിയിൽ സിന്ദൂരപ്പൊട്ടും തൊട്ട്…
പട്ടു ചേലയുംചുറ്റി സുഗന്ധം പരത്തി-
രാവിന്നിരുൾ ചേർന്നവൾ നടന്നു.
‘ജോലി’യും കഴിഞ്ഞു മടങ്ങുന്ന
നേരത്തുകൂലിയായ്കിട്ടിയ
നോട്ടുകളൊക്കെയുമെണ്ണി-
പ്പെറുക്കിത്തിരുകി മാറിൽ.
പുലർകാലമറിയിച്ചു
പൂങ്കോഴി കൂകുന്നു.
മെല്ലെ മറഞ്ഞു പോയ്‌
താരാ ഗണങ്ങളും.
ആദിത്യകിരണങ്ങ
ളേറ്റുവാങ്ങിക്കൊണ്ടു
വ്രീളാവിവശ-
യായമ്പിളിയും.
ഇരവുകൾ പകലാക്കി
യുറക്കച്ചടവോടെ
ഇടറുന്ന ചുവടുകൾ
മുന്നോട്ടുവയ്ക്കവേ…
ഒരു പിഞ്ചു പൈതലിൻ
രോദനം കേട്ടവൾ
തെല്ലിടകാതോർത്തു
നിന്നുപോയി.
പിന്നെത്തിരിഞ്ഞു
തിരഞ്ഞു നടക്കവേ …
പിന്നെയും രോദനം
കേട്ടപോലെ.
ഞെട്ടിത്തരിച്ചുപോയ-
ക്കാഴ്ച്ച കണ്ടവൾ
സ്തബ്ദയായ്ത്തീർന്നു-
പോയാനിമിഷം.
ഇന്നലെ രാത്രിയിൽ തൻ മടിക്കുത്തഴിച്ചവൻ പാൽ മണം
മാറാത്തൊരാപ്പിഞ്ചു പൈതലിൻ
വായ്പൊത്തിടുന്നു നിശബ്ദയാക്കീടുന്നു.
രോഷത്താൽ നിന്നു വിറച്ചു
ജ്വലിച്ചവൾ ,തെല്ലും മടിക്കാതിടറാത്ത ചുവടോടെ മുന്നോട്ടു പാഞ്ഞു രൗദ്രഭാവത്തൊടെ
ഒറ്റക്കൽ മുക്കുത്തി
വെട്ടിത്തിളങ്ങി.
കണ്ണുകൾ രണ്ടും
തീപ്പന്തങ്ങളായ്.
അഴിഞ്ഞങ്ങുലഞ്ഞ
കാർക്കൂന്തലിൽ
നിന്നുമാ മുല്ലപ്പൂമാല
നിലത്തു വീണു.
ഇടുപ്പിൽ തിരുകിയ
കത്തിയെടുത്തവൾ
ആർത്തട്ടഹസിച്ചു
മൊഴിഞ്ഞിങ്ങനെ
“നീതി തൻ ദേവതേ
കൺ തുറക്കല്ലേ നീ…
എൻ നീതിഞാ-
നൊന്നുനടത്തിടട്ടെ.”
കാറ്റുപിടിച്ചപോൽ
പാഞ്ഞടുത്തെ-
ത്തിയവളാഞ്ഞങ്ങു-
വെട്ടിയടർത്തി മാറ്റി.
ചോരയൊലിപ്പിക്കും
മാംസത്തിൻ
തുണ്ടവൾഅറപ്പോടെ ദൂരെവലിച്ചെറിഞ്ഞു.
“ഇനിയൊരു
പെൺകുഞ്ഞിൻ
രോദനം കേൾക്കരു-
തിവ്വിധം നീ കാരണം.”
തന്നെ’നിശാഗന്ധി’യാക്കിയ
മർത്യരെയപ്പോഴ-
വളൊന്നങ്ങോർ-
ത്തു പോയി.
പുതു ജീവിതം മോഹിച്ച
മാതാവും,പിന്നെ
മദ്യത്തിൽ മുങ്ങിയ
താതനും ഭ്രാതാവും.
പിന്നെപ്പിതാവുതന്ന-
ഗ്രജന്മാരും
മുഖമോർക്കാൻ
കഴിയാത്ത മാലോകരും.
കുഞ്ഞിനെ
മാറോടടുക്കി പ്പിടിച്ചവൾ
നെറ്റിത്തടത്തിലാ-
യുമ്മ വച്ചു.
ഇന്നലേം കണ്ടൊരാ
നാടോടി-
ക്കൂട്ടത്തെഇന്നവിടെങ്ങുമേ
കണ്ടതില്ല.
“എൻപിഞ്ചു പൈതലേ
ചില്ലറക്കാശി
നായ്നിന്നെയുപേക്ഷിച്ചോ
നിന്നമ്മയും.
ഇല്ലിനിയാർക്കും
ഞാൻ വിട്ടുകൊടുക്കില്ല
ഞാൻ പെറ്റതല്ലാത്തൊ-
രെൻകുഞ്ഞിനെ
കരയല്ലേ പൈതലേ
ഇനി നിന്റെ
നേർക്കൊരു കഴുകന്റെ
കണ്ണും പതിക്കുകില്ല .
ഉണ്ടാകും ഞാൻ
നിനക്കമ്മയായ്
ക്കാവലായ് എൻജീവ ശ്വാസം
നിലയ്ക്കു വോളം.”
മുല്ലപ്പൂമാല ചവിട്ടി
ഞെരിച്ചവൾ മുന്നോട്ടു
കാൽ വച്ചു
ധീരയായി.
പെണ്ണിന്റെ വായ്
മൂടിക്കെട്ടും
സമൂഹമേ…
എന്നുമിനിയതു സാധ്യമല്ല…..!!!!
