ସାଧୁ ସଙ୍ଗ
ସାଂସାରିକ ସୁଖ ମାୟା ମୋହ ପ୍ରତି
ଆସକ୍ତି ନ ଥାଇ ତିଳେ
ସତ୍ୟ, ଉଚିତ ଓ ଅମୃତ ବଚନେ
ସାଧୁ ଭାବେ ଗଣା ବଳେ ।
ସାଧୁ ସଙ୍ଗ ଲଭି ଅସାଧୁ ବି ସାଧୁ
ଯେପରି ପରଶମଣି
ଲୁହା ମଧ୍ୟ ଉକ୍ତ ମଣି ସଂସ୍ପର୍ଶରେ
ଶୁଦ୍ଧ ସୁବର୍ଣ୍ଣ ସେ’କ୍ଷଣି ।
ପରିବେଶ ଓ ପରିସ୍ଥିତି ସଂସର୍ଗ
ବ୍ୟକ୍ତିତ୍ଵ କୁ ପ୍ରଭାବିତ
ଶୃଙ୍ଖଳିତ ହେଲେ ଜୀବନର ପଥ
ବ୍ୟକ୍ତିତ୍ଵ ସଦା ମହତ୍ତ୍ଵ ।
ଯିଏ ଆତ୍ମ ଦର୍ଶନ ସାଧନା ସହ
ଇନ୍ଦ୍ରିୟ ସୁଖ ବର୍ଜ୍ଜିତ
ସାଧୁ ଭାବେ ସେହି ସାଧୁଙ୍କ ସଂସ୍ପର୍ଶେ
ଜୀବନ ହୁଏ ଉନ୍ନତ ।
ସାଧୁ ସଙ୍ଗ ହିଁ ପ୍ରଥମ ଭକ୍ତି ଅର୍ଘ୍ୟ
ସାଧୁ ସେବା କରଣୀୟ
ସିଦ୍ଧ ସାଧୁ ଠାରୁ ଜ୍ଞାନ ପ୍ରାପ୍ତି ବଳେ
ଜୀବନ ମଙ୍ଗଳମୟ ।
ଅନ୍ତଃକରଣ ର ଶ୍ରେଷ୍ଠ ଭାବ ସଦା
ସାଧୁ ଭାବ ଭାବେ ଗଣା
ସଦଗୁଣ-ସଦାଚାର ଭାବ ବ୍ୟକ୍ତି
ସାଧୁ ରୂପେ ଜଣା ଶୁଣା ।
ବ୍ରହ୍ମତ୍ଵ ଲାଭର ବି ଶ୍ରେଷ୍ଠ ସୋପାନ
ପ୍ରଥମରେ ସାଧୁ ସଙ୍ଗ
ତୀର୍ଥ ଭ୍ରମଣର ଆବଶ୍ୟକ ନାହିଁ
ଯଦି ରହେ ସାଧୁ ସଙ୍ଗ ।
ଦୁର୍ଲ୍ଲଭ ମଣିଷ ଶ୍ରେଷ୍ଠ ଜୀବ ଭାବେ
ଜନ୍ମି ଏ ମର୍ତ୍ତ୍ୟ ଭୁବନ
ପ୍ରଭୁଙ୍କ ସାନିଧ୍ୟ ଲାଭ ହେବା ପାଇଁ
ସାଧୁ ସଙ୍ଗ ପ୍ରୟୋଜନ ।
ପ୍ରଭୁ ନାମ ଗୁଣ ଭଜନ କୀର୍ତ୍ତନ
ସୁଯୋଗ ଏହି ଜନ୍ମରେ
ସାଧୁ ସଙ୍ଗ ସଦ-ଜ୍ଞାନ ପ୍ରାପ୍ତି ବଳେ
ସମ୍ଭବ ହେବ ଅଚିରେ ।
ଭଣ୍ଡ ସାଧୁ ଗଣ ମାଳ ମାଳ ଏଠି
ସ୍ଵଘୋଷିତ ସିଦ୍ଧ ସାଧୁ
ଜଟା ଦାଢ଼ି ବେଶ ଆଢ଼ୁଆଳେ ଲୁଚି
ରହିଛି ଭାବ ଅସାଧୁ ।
ନିଜକୁ ନିଜେ ଗଢ଼ି ତୋଳିବାକୁ ହେବ
ସାଧୁ ସମ ରୀତି ନୀତି
ସତ୍ୟ ଧର୍ମ ପରୋପକାର ଓ ସେବା
ବଳେ ସାଧୁ ପଦ ପ୍ରାପ୍ତି ।
ପବିତ୍ର ବଳୟ ଭିତରେ ହୃଦୟ
ସଦା ହେଲେ ନିୟୋଜନ
ଆତ୍ମା-ସାଧୁ ନିଜ ହୃଦୟ ଭିତରେ
ଆପେ ପ୍ରାପ୍ତି ବ୍ରହ୍ମ ଜ୍ଞାନ ।
ସଂସାର ଭିତରେ ରହି ସତ୍ୟ ପଥ
ସଦା ହେଉ ଚଲା ପଥ
ପ୍ରଭୁ ନାମ ନିତ୍ୟ ଭଜନ କୀର୍ତ୍ତନେ
ସାଧୁ ସଙ୍ଗ ହୃଦ ଗତ ।
ବେଦ ଜ୍ଞାନ ଅବା ସାଧୁ ସଙ୍ଗ ବିନା
ଶ୍ରୀକୃଷ୍ଣ ଭାବରେ ମଜ୍ଜି
ଗୋପ ଗୋପାଙ୍ଗନା ପୁଣି ମୀରା ବାଇ
ମୁକ୍ତି ପ୍ରାପ୍ତି କୃଷ୍ଣ ଭଜି ।
ଯୋଗେଶ୍ୱର ଶ୍ରେଷ୍ଠ ସାଧୁ ସଙ୍ଗେ ଭାବ
ମନରେ ହେଉ ଚିନ୍ତନ
ଅନ୍ୟ ସାଧୁ ସଙ୍ଗ ନାହିଁ ପ୍ରୟୋଜନ
ସାଧୁ ଶ୍ରେଷ୍ଠ ନାରାୟଣ ।
