मारै का है कोरोनवा का….

बन के नगीना जड़े रहौ
घरवै मा तुम पड़े रहौ
मारै का है कोरोनवा का
जंग अनोखी लड़े रहौ

घरवा से बाहर न घूमौ
यारन के साथे न झूमौ
बच जइहौ बस एत्ता मानौ
गले मिलौ न कोऊ का चूमौ
केत्तौ काम जरूरी होवे
जिद्द पा अपने अड़े रहौ
मारै का है कोरोनवा का
जंग अनोखी लड़े रहौ

रहैं सुरक्षित बाबू मइया
घोड़ा, गदहा,भैंसी,गइया
छोट छोट लरिकन का सँभारो
एन पर तेज असर बा भइया
पाँव न उखड़ै घुँइ से कबहुँ
खुब अंदर तक गड़े रहौ
मारै का है कोरोनवा का
जंग अनोखी लड़े रहौ

फागुन गवा चली है चैती
छोड़ौ कुश्ती धरौ लठैती
टीवी चलावौ पिक्चर देखौ
कुछ दिन घर मा करौ बकैती
बूढ़ बुजुर्ग का बच्चा कइके
अब तुम बनिके बड़े रहौ
मारै का है कोरोनवा का
जंग अनोखी लड़े रहौ

बिना बात न गुरेरौ मोछा
पहनौ लुंगी लेओ अँगौछा
बहुत रहेव साहब बन के अब
चलौ सँभालौ झाड़ू पोछा
बीवी केत्तौ नेह देखावै
हाथ जोड़ के खड़े रहौ
मारै का है कोरोनवा का
जंग अनोखी लड़े रहौ