बूढेंद की बेदना नी सहेंदी जी!
नी मरेंदू नी मरेंदू नी मरेंदू जी,
बूढेंद की बेदना नी सहेंदी जी,
अब बचीक क्या करलू मी,
कनकै रैलो मी,
मौत भी लुकी गे कखी,
औंन्दी नी छ जी,
नी मरेंदू नी मरेंदू नी मरेंदू जी!
ना उठेंदू ना हिटेंदू,
ना पडैं दूं ना बैठें दूं जी,
ना सुणे दूं,ना बोलें दूं ही,
अब बचीक क्या करलू,
कनकै रैलो मी,
मौत भी लुकी गे कखी,
औंन्दी नी छ जी,
नी मरेंदू नी मरेंदू नी मरेंदू जी!
भूख हर्ची तीस हर्ची,
नींद भी हर्ची,
घड़ी घड़ी हगण मूतण की,
आफ़त ऐ पड़ी,
जूनखा भी ह्वै ग्या गिला,
क्या पैरलू मी,
कनकै रैलो मी ,
मौत भी लुकी गे कखी,
औणी नी छ जी,
नी मरेंदू नी मरेंदू नी मरेंदू जी,
अब बचीक क्या करलू मी!!
नौना नौनी लाडिक ब्वारी,
घोर नी औन्दा कुई,
ऊठी नी सकदू,
बैठी नी सकदू,
या कनी बिपदा ऐ गी,
अब बचीक क्या करलू,
कनकै रैलो मी,
मौत भी लुकी गे कखी,
औणी नी छ जी,
नी मरेंदू नी मरेंदू नी मरेंदू जी!!
