प्याकको ह्याङ्गओभर
फकिरा गाउँका रसुल चाचाका छोरा साउदीमा छन् । उताबाट छोराले कहिलेकाँही बुवालाई फोन गर्दा रहेछन् । चाचाले आफत् परेका बेला यतैबाट पनि प्याक लिएर फोन गर्दा रहेछन् । धेरै पटक संवाद गर्दा गर्दै उनको ब्यालेन्स सकिदो रहेछ । त्यसपछि मोबाईलमा पटक-पटक बज्ने ‘भ्वाईस म्यासेज’ ले उनी तनावमा पुग्ने गरेको अनुभव सुनाए ।
जाडोको मौसममा एक दिन म घुर तापी रहेको थिएँ । रसुल चाचा म बसेको घुर नजिकैबाट कत्तै जाँदै थिए । मलाई हेरेपछि रोकिए । खल्तीबाट मोबाईल निकाल्दै भने, ‘बौआ, तुँ पढललिखल छह,काठमाण्डुलमे रहै छह, देखह ने हमर ई मोबाईल खराब भँ गेलै जेना बुझाईछ ‘(बावु तिमी पढेलेखेका छौं, काठमाडौंमा बस्छौं, हेर न मेरो मोबाईल बिग्रे जस्तो पो छ …!)
मैलै सोधें, ‘मोबाईलमा के भयो चाचा ?’
रसुल चाचाले भने, ‘मैले जीवनमा रक्सी देखेको पनि छैन, झन छुने कुरा त असम्भव नै हो ।’
चाचाले मोबाईल देखाउँदै रक्सीको कुरो गरि रहँदा म आश्चर्यचकित थिएँ । मैले चाचाले ‘के भन्न खोजेको’ भनेर कुनै मेसो पाउँन सकिरहेको थिइन । किनभने मोबाईल र रक्सीका कुरा बेमेल जो थियो ।
म चाचालाई हेर्दै सोधें,’मैले तपाईको कुरै बुझिन, के भन्न खोज्नु भएको हो ?’
चाचाले मेरो हातमा रहेको मोबाईल तानेर कसैलाई फोन गर्न थालेछन् । उक्त मोबाईलमा आएको ‘भ्वाईस म्यासेज’ मलाई सुनाउन लाग्नु भयो । ‘म्यासेज’मा भन्दै थियो, ‘तपाईको ‘प्याक’ सकिसकेको छ ….।’
मैले भने,’चाचा!तपाईले लिएको प्याक सकिएछ, पुनः रिचार्ज गर्नुस्, मोवाईल ठीकै छ ।’
त्यसपछि चाचाले दिएको जबाफबाट म भूँडी मिच्ची-मिच्ची हाँस्न थालेँ !
चाचाको जवाफ थियो, ‘ रक्सी सेवन नगर्नेलाई पनि ‘प्याक’ सकियो भन्छन् त ?’…
मैले मोबाईल र रक्सीबारे चाचाका कुरा बुझिसकेको थिएँ ।
चाचालाई प्रतिप्रश्न गरें,’रक्सीको प्याकबारे कसरी तपाईले थाहा पाउँनु भयो ?’
चाचा बतिसी देखाउँदै भने,’चुनावमा गाउँका केटाहरूले प्याकका कुरा खुबै गर्थे । एउटालाई यसबारे सोधेको थिएँ-यो प्याक के हो ? तिनले भनेका थिए- रक्सीको प्याक …! मैले त्यसपछि रक्सीको प्याक हुन्छ भन्ने ठानें, मोबाईलमा पनि प्याक कै कुरो आयो, त्यसैले….!
गाउँमा चुनावका बेला रक्सी बाँड्ने कुसंस्कृतिले एक जना सर्वसाधारणलाई कतिसम्म आजित बनाउँदो रहेछ ? गाम-गाममा निरक्षर चाचाहरूलाई समेत ‘प्याक’ को जानकारी भै सकेको रहेछ । त्यसैले त रसुल चाचा जस्ता गाउँका सोझासाझा र सज्जनलाई समेत ‘प्याकको ह्याङ्गओभर’ ले छोडेन छ !
#दिनेश_यादव
