गणतंत्रता दिवस
केसरिया हम कहां से लइयै
वीर बचल हे कन्ने अपने
कायरता आउ दब्बूपन में
अखने हम सब की हरसइयै
कइसे गणतंत्रता दिवस मनइयै
सच तऽ अब बदले हे
झूठ फरेब हय उधम मचइले
सच बोलऽ हय त मारल जा हे
उज्जर रंग हम कन्ने से लइयै
कइसे गणतंत्रता दिवस मनइयै
हरियाली हलइ धरती के लहंगा
अब खेत में हे महल अटहंगा
दाना पानी भेलय महंगा
ई महंगाई में कि हरसइयै
कइसे गणतंत्रता दिवस मनइयै
चक्र विनाश के उल्टा है अब
रक्षक अखने भक्षक बनल हे
प्रतिपालक हखिन उधम मचइले
फेर चक्र अखने हम केकरा लइयै
कइसे गणतंत्रता दिवस मनइयै
शान हलइ गांधी के खादी
उ भी हो गेलइ अखने वादी
सत्य अहिंसा असूया सब छोड़
कइसे झूठा वाना बनिये
कइसे गणतंत्रता दिवस मनइयै
