कहाँ मिली गाँव के बयार
कहाँ मिली गाँव के बयार शहर में,
कहाँ मिली गाँव के बयार।
बरगद पीपर के मिली नाहीं छाया,
शहर में आगि तरे जरे लागी काया,
धुँवा होई जिनिगी तोहार शहर में।
कहाँ मिली गाँव के बयार शहर में…
निमिया पकड़िया के नीचे डालि खटिया,
खुलहा बतास में करेला लोग बतिया,
कोठरी में बंद परिवार शहर में।
कहाँ मिली गाँव के बयार शहर में…
शहरी विकास के बा फेल सजी दावा,
ए सी से बा बेसी नीक गाँवे के हावा,
सँसवो लिहल दुस्वार शहर में।
कहाँ मिली गाँव के बयार शहर में…
– आकाश महेशपुरी
दिनांक-16/06/2022
