उइ घर के जिम्मेदार हवैं
उइ घर के जिम्मेदार हवैं।
कोई गाना गावै का मतलब,
कोउ मुंह मटकावै का मतलब,
कोई नाक कटावै का मतलब,
तुम्हरी खातिन बेकार हवैं।
उइ घर के जिम्मेदार हवैं।।
तुम उनते कहिहौ का मतलब,
बदनामी पइहौ का मतलब,
पाछे पछितइहौ का मतलब,
गोइड़रि के लम्बरदार हवैं।
उइ घर के जिम्मेदार हवैं।।
ज्यादा ना ब्वालौ का मतलब,
फर्जी ना ड्वालौ का मतलब,
बसि आलू छ्वालौ का मतलब,
उनहू के बेटवा चार हवैं।
उइ घर के जिम्मेदार हवैं।।
दुनिया मा पइसा का मतलब,
सब अपने जइसा का मतलब,
बसि मोटे भइसा का मतलब,
प्रेमी होइ गयें हजार हवैं।
उइ घर के जिम्मेदार हवैं।।
—- डॉ.सतगुरु प्रेमी
