अजबे जमाना आइल गजबे बुझात !!

विध- गीत (छंदमुक्त)
अजबे जमाना आइल गजबे बुझात !!
________________________________

अजबे जमाना आइल गजबे बुझात|
बढ़ल महंगाई मुंह दाँतो अब बन्हाता||

खाईं भात चोखा अब मिली नाहीं पुआ|
सगरो अँहार बाटे लउके खाली धुआं|
महंगी बेजोड़ बाटे करत बाटे सासत|
कहाँ ले बताईं अपना जिनगी के आफत|

घरवाँ में ढेबुआ ना खुलताटे खाता|
अजबे जमाना आइल गजबे बुझात||

नून- रोटी महंग भइल खून भइल सस्ता|
रोजी – रोजगार के भुलाइल बाटे रस्ता|
सुबहे से शाम भइल खोजतानी नोकरी|
मन करे पुका फारि हायसुकि भोंकरीं|

घेरले हतासा बाटे कुछो ना सुहाता|
अजबे जमाना आइल गजबे बुझात||

जिनगी दुभर भइल सुझे नाहीं गाना|
लोक- लाज बची कस करीं का बहाना|
बजर परे माटी मिले आजु के जमाना|
मदद केहूँ करे नाहीं देला खाली ताना|

लोर गीरे झर – झर कपरो दुखाता|
अजबे जमाना आइल गजबे बुझात||

आइल बेमारी एगो नाम ह करोना|
नोकरी के नाम पर येकरे बा रोना|
ढेबुआ ना जेबिआ में घर कइसे चली|
मुँहवा छुपाईं कहाँ, कहाँ जाके हलीं|

हाथ बाटे कपरे प राह ना सुझाता|
अजबे जमाना आइल गजबे बुझात||

✍️ संजीव शुक्ल ‘सचिन’