ظاہر ہے اس سے دیکھئے عظمت رسول کی

ظاہر ہے اس سے دیکھئے عظمت رسول کی
شاہی خدا کی ہے تو وزارت رسول کی

جس دل میں بس رہی ہے محبّت رسول کی
بیشک ملیگی اس کوشفاعت رسول کی

جو شخص مانتا ہے ہدایت رسول کی
جنّت میں جائےگا وہ بدولت رسول کی

الله جانے حشر میں ہو ان کا حشر کیا
کہتے ہیں جو کہ کیا ہے ضرورت رسول کی

دین خدا کے واسطے گھر بار چھوڑ دے
دیتی ہے درس آج بھی ہجرت رسول کی

محفل سجی ہے خوب محمّد کے نام کی
خوابوں میں آج ہوگی زیارت رسول کی

ارشدؔ تری زبان پہ نعت نبی ہے آج
تجھ پر ہوئی ہے نظر عنایت رسول کی