केतने जिनिगिया के खाइ गइलs राजा जी

गीत
आखिरी में राह पर आइ गइलs राजाजी
केतने जिनिगिया के खाइ गइलs राजा जी -२

अपने घरे में खुद अगिया लगवलs
अपने दुआरी पर कील ठोकववलs
दुनिया में नाम हँसवाइ गइलs राजा जी
केताने जिनिगिया के खाइ गइलs राजा जी -२

अपने घरे में जंग लंबा चलववलs
कल्हिए कदम इहो काहें ना उठवलs
ओह बेरा काहें पगलाइ गइलs राजा जी
केतने जिनिगिया के खाइ गईलs राजा जी -२

बिना काम रूपिया पानी में बहववलs
रुपिया वसूले बदे टेक्स बढ़ववलs
जनता से भीख मँगवाइ गइलs राजा जी
केतने जिनिगिया के खाइ गइलs राजा जी -२

अवध किशोर ‘अवधू’
मोबाइल नंबर 9918854285
दि.19-11-2021