👗कैना👗

मीठ-मीठ बोली
होंठ तोर लाली।
निच्चट गोरी तै
पहिरे सोनहा बाली।।
🍃🍃🍃🍃🍃🍃
आँखी हावय कजरारी
बिरौनी है मतवार।
मतवारी तोर नैना
काजर के करे श्रृंगार।।
🍃🍃🍃🍃🍃🍃
गाल गजब तोर भाथे
छुंतेव मैं हाली- हाली।
दांत फुले मोंगरा जइसे
नथनी करथे हलाली।।
🍃🍃🍃🍃🍃🍃
माथा के टिकली
मुड़ी के तोर खोपा।
जेमा सजे गोंदा
एही मोर तोफा।।
🍃🍃🍃🍃🍃🍃
सुंदरता के रूपवती
घेंच लगे सुराही।
ऐसे तोर नख़रा
एक दिन अलहन लाही।।
🍃🍃🍃🍃🍃🍃
भूँजा जउन दिखथे
ब्रह्मा कैसे साँचा बनाय।
सुंदरता अउ बढ़ जाथे
दुपट्टा जउन एमा अरझाय।।
🍃🍃🍃🍃🍃🍃
छाती उभरे
मोती -माला जेमा अरझे।
सांस तोर चलथे
वइसे- वइसे उभरते।।
🍃🍃🍃🍃🍃🍃
चुरी तोर हाँथ म
बिछिया घलो चमकत हे।
बाँह कटे चोली
नागमोरी दमकत हे।।
🍃🍃🍃🍃🍃🍃
कमर करधनी
नाभि तक हे माला।
झूलत फुंदरा तोर पीठ म
धधकत हे आगी के ज्वाला।।
🍃🍃🍃🍃🍃🍃
चञ्चल तोर कमर हावय
मटक -मटक गोठियाथे।
मोर छाती धक-धक करथे
कहूँ कोति एहर जाथे।।
🍃🍃🍃🍃🍃🍃
जांग ,यौवन भरे
ब्रह्मा कोंन माटी ले चिकनाय।
कइसे गढ़थस तै नारी
जेहर मन ल उकसाय।।
🍃🍃🍃🍃🍃🍃
पाँव तोर पैरी
छुनूर-छुनूर इतराथे।
अकबक हो जाथे टुरा
जेन गली म आथे-जाथे।।
🍃🍃🍃🍃🍃🍃
देह -देह तोर आभा हे
पोलखा चोली सुख पाथे।
हे!ब्रह्मा एको महीना बर
महुँ ल चोली बनाते।।

🔥सुरेश अजगल्ले”इन्द्र”🔥

👗कैना👗

You may also like these posts