നീപോയതിൽ-

നീപോയതിൽ-
പ്പിന്നെ
*************

ഒരുവാക്കുപോലുംപറയാതെ
നീ എന്നിൽനിന്നുമിറങ്ങിപ്പോ-
യതിൽപ്പിന്നെയാണ്
എനിക്കെന്നെത്തന്നെ
നഷ്‍ടമായത്.

നീ പോയതിൽപ്പിന്നെയാണ് ഭക്ഷണത്തിനുരുചിയില്ലയെന്നു
ഞാൻതിരിച്ചറിയുന്നത്.

നീ പോയതിൽപ്പിന്നെയാണ്
ഉറക്കമെന്നെ വിട്ടകന്നതും
സ്വപ്‌നങ്ങളെന്നോടു വിടചൊല്ലിയതും.

നീ പോയതിൽപ്പിന്നെയാണ്
ഋതുക്കൾ മാറുന്നതു
ഞാനറിയാതെപോയത്.
മഴപെയ്യുന്നതും,മഞ്ഞുപൊഴിയുന്നതും
ഞാനറിഞ്ഞതേയില്ല.

പൂക്കൾവിടരുന്നതും ശലഭങ്ങൾ
പാറിപ്പറക്കുന്നതും
ഞാനറിയാതെപോയതും
നീ പോയതിൽപ്പിന്നെയാണ്.

ഓണവും,വിഷുവും വരുന്നതും കണിക്കൊന്നകൾ പൂവിടുന്നതും ഞാനറിഞ്ഞില്ല.
അതും നീ പോയതിൽപ്പിന്നെയാണ് .

അരുവിയുടെകളകളാരവവും
കുയിലിന്റെപാട്ടുംഞാൻ കേൾക്കാതെ
പോയതും നീ പോയതിൽപ്പിന്നെയാണ്.

സൂര്യൻ ഉദിക്കുന്നതും,
അസ്തമിക്കുന്നതും ഞാനറിഞ്ഞില്ല.
ചന്ദ്രനുദിക്കുന്നതും,
നിലാവ്പരക്കുന്നതും,
ഇളംകാറ്റുവീശുന്നതും ഞാനറിയാതെ
പോയതും നീ പോയതിൽപ്പിന്നെയാണ്.

നീ പോയതിൽപ്പിന്നെയാണ് എന്റെ മുടിയിഴകളിൽ വെള്ളിനൂലുകൾ
കാണാൻ തുടങ്ങിയത്.

എന്റെദേഹത്തുചുളിവുകൾ വന്നുതുട-
ങ്ങിയതും,എന്റെ ചന്തം
കുറഞ്ഞതും നീ പോയതിൽ
പ്പിന്നെയാണ്.

എനിക്കുവയസായിയെന്നു ഞാനറിയുന്നതും
നീ പോയതിൽപ്പിന്നെയാണ്.

ഞാൻ എന്നെത്തന്നെ
മറന്നുപോയതും,
മൗനത്തിൻ വാല്മീകത്തിലൊളിച്ചതും നീപോയതിൽപ്പിന്നെയാണ്.

നീ പോയതിൽപ്പിന്നെയാണ്
ഞാൻ നിന്നെ പ്രണയിച്ചിരുന്നുവെന്നു ഞാനറിയുന്നതുപോലും.💕

നീ പോയതിൽപ്പിന്നെയാണ് ഞാൻതന്നെയായിരുന്നു നീയെന്നു ഞാനറിയുന്നതും ❤️