ନୀରବତାର ବାର୍ତ୍ତା
ଭାବର ପରିପ୍ରକାଶ ଅଭାବେ
ହୃଦୟେ ବ୍ଯଥିତ ଚିନ୍ତା
ଭାରାକ୍ରାନ୍ତ ମନ ଆପେ ସହମତି
ସର୍ବୋତ୍ତମ ନୀରବତା
ନୀରବତା ସହ ଲୁକାୟିତ ବାର୍ତ୍ତା
ପ୍ରତିଧ୍ଵନି ହୃଦୟରେ
ବିବେକର ଅହରହ ବିଶ୍ଳେଷଣ
ଫେରି ରହୁଛି ମନରେ
କେବେ ନୀରବତା ଅସୁମାରୀ ଆଶା
ଚାପି ମନର ଯନ୍ତ୍ରଣା
ବେଦନା ବି ରୂପାୟିତ ନୀରବରେ
ନିଶବ୍ଦେ ଝଙ୍କୃତ ବୀଣା
ନୀରବତା ସହିତ ପ୍ରତୀକ୍ଷାରେ
କିଛି ପାଇବାର ଆଶା
ମନରେ ଜିଜ୍ଞାସା ମନୋଭାବ ପ୍ରାୟ
ସତେ ମେଣ୍ଟିବ ପିପାସା ।
ନୀରବତା ସୁଯୋଗ ପରି ପ୍ରତ୍ୟୟ
ସତେ ଘଣ୍ଟି ମନ୍ଦିରର
ହାତ ଛଡା ନ କରି ସୁଯୋଗ, ବାଜେ
ଥରେ ନୁହେଁ, ବାରମ୍ବାର
ସମ୍ପର୍କ ଓ ଶତ୍ରୁତା ସହ ମଧ୍ୟସ୍ଥି
ସାର୍ଥକ ହିଁ ନୀରବତା
ସ୍ମୃତି ରୋମନ୍ଥନ ପରେ ଚାପି ହୁଏ
ମନର ସବୁ ତିକ୍ତତା
ନୀରବତା ପ୍ରାୟ ଆବଶ୍ୟକ ଅଛି
ଭୀରୁ ନୁହେଁ ନୀରବତା
ନୀରବତା ଅସ୍ତ୍ର ପ୍ରୟୋଗରେ ପ୍ରାପ୍ତି
ବ୍ୟସ୍ତ ମନେ ଏକାଗ୍ରତା
ନୀରବତା ସହ ଓଦା ଆଖି ପତା
ପଢ଼ି ହୁଏ ହୃଦ କଥା
ପ୍ରେମୀ ଯୁଗଳଙ୍କ ନୀରବ ଓଠରେ
ମାପି ହୁଏ ସେ ‘ ଉଷ୍ମତା
ମନ ମନ୍ଦିରେ ନୀରବତାର ଚିହ୍ନ
ସାନିଧ୍ୟରେ ଉଜ୍ଜୀବିତ
ନୀରବରେ ରହି ଆଖିରେ ସୂଚନା
ତନ ମନ ଉଲ୍ଲସିତ ।
ନୀରବତା କରେ ପ୍ରଶ୍ନର ପାହାଡ
ଉତ୍ତର କୁହୁଳିକାରେ
ଅଜଣା ପଥିକ ବାଟ ବଣା ସମ
ଅଜଣା ସେ ‘ ଠିକଣାରେ
ପ୍ରିୟାର ଅଭିମାନୀ ମନରେ ଉଠେ
ନୀରବତା ରୂପୀ ଢେ଼ଉ
ମାନଭଞ୍ଜନ ର ବାର୍ତ୍ତା ବି ପ୍ରସାର
ବନ୍ଧନରେ ଥାଉ ଥାଉ ।
ନୀରବତା, ଆବେଗତା ହୃଦୟର
ଆଢ଼ୁଆଳେ ଅଛି ବାର୍ତ୍ତା
ହୃଦୟ ତଳର ଭାଷା ବୁଝି ହେଲେ
ନୀରବତା ଦ୍ଵାରା କଥା
ନୀରବତା, ସାଧନାର ଅଟେ ଉତ୍ସ
ନିଜ ଚିନ୍ତା ଚେତନାରେ
ହୃଦୟରେ ଆତ୍ମ ଜ୍ଞାନର ବିକାଶ
ଦିବ୍ୟ ଜ୍ଞାନ ସହଜରେ ।
ଅବ୍ୟକ୍ତ ଅସହ୍ୟ ବେଦନାରେ ପ୍ରାଣ
ପରେ ନୀରବତା ପନ୍ଥା
କେହି କେହି ନୀରବତାର ସୁଯୋଗେ
ଦେଇଥାନ୍ତି କେତେ ବ୍ୟଥା
ନୀରବରେ ପ୍ରତିବାଦର ବି ବାର୍ତ୍ତା
ଦାବୀ ହାସଲର ପନ୍ଥା
ଅଯଥା କଥାବାର୍ତ୍ତାରୁ ବର୍ତ୍ତିବା
ଶ୍ରେଷ୍ଠ ପଥ ନୀରବତା
ତିକ୍ତ ପ୍ରାଣ କୋଳାହଳ ପରିବେଶେ
ଆଶା ନୀରବତା କ୍ଷେତ୍ର
ଶିକ୍ଷାଳୟ,ମନ୍ଦିର ଓ ସଭା ସ୍ଥଳେ
ନୀରବତା ହିଁ ପବିତ୍ର
ସ୍ମୃତି ଉଜ୍ଜୀବିତ ପ୍ରତି ମୁହୂର୍ତ୍ତରେ
ବନ୍ଧନ ଆତ୍ମୀୟତା ର
ବୀତସ୍ପୃହ ଜୀବନରେ ଆଶା ପ୍ରାୟ
ସ୍ୱର ନୀରବତାର
