हरियालौ सावन (ब्रजभाषा गीत)
🦚
हरियालौ सावन
****************
सरर-सरर-सर सररररररर, पवन चलै मनभावन ।
तौ सखी समझ लै, आय गयौ री सावन ।।
*
हरी निबौरी लगैं नीम कौ पेड़ झूम बौराबै,
धूप लगै काँटे-सी मनुआ ऊमस ते अकुलाबै,
बदरी के जब टुकड़ा खेलैं धूप-छाँव हर आँगन ।(1)
*
बरसा की पहली फुहार जब, धरती कूँ सरसाबै,
सौंधी-सौंधी माँटी जब हर एक दिसा महकाबै,
हरौ रंग बिखरै चहुँ ओरा, खेतन क्यारी बागन।(2)
*
डारन पै जब डारैं झूला, झूलैं मिलजुल छोरी,
पीहर कूँ जब जाय छोड़ कैं, सासुल कौ घर गोरी,
बाबुल के घर सुपने में जब, आय सताबै साजन ।(3)
*
उमड़-घुमड़ कै कारे-कारे, जब मेघा घिर आमैं,
बिजुरी कड़कै ऐसी कै मन धीरन के दहलामैं,
झरर-झरर बरसैं जब बदरा, धरती है जाय पावन ।(4)
*
🌹
महेश जैन ‘ज्योति’,मथुरा !
🌾🌾🌾
