स्वार्थी मान्छे (#नेपाली_भाषा)
फकिरा गाउँका सम्पैत काका हट्टाकट्टा थिए । आफ्नो जीवनमा उनी यति खटेका थिए की उनका तीन पुस्तासम्म बसी-बसी खान पुग्ने गरी सम्पत्ति जुटाई दिएका थिए । उनी किसान थिए । उनको दरबाजामा दुई/तीन भखारी र ओसारी/घरभित्रका कोठीहरू अन्नाजले सधैं भरिभराउ हुन्थे । तर, नगदी उनीसंग कहिले रहेन । हाटबजारको किनमेल घरको अन्नाज बेचेरै गर्थे । एक पोका नुनका लागि पनि उनले अन्नाज नै बेच्नु पर्थ्यो ।
सम्पैत काका दानबीर पनि थिए , गाउँका कोही पनि उनको दरबाजामा सहयोगको याचना गर्न आउँदा खाली हात फर्कदैन्थे । उनले जीवनकालमा धेरैलाई अन्नाजै बेचेर भए पनि सक्दो आर्थिक सहयोग गर्थे । आफू बिरामी हुँदा पनि अन्नाज नै बेचेर उपचार गराउँथे । एक दिन अचानक उनलाई मुटुको व्याथाले च्यापे पछि उनी तत्कालै जसोतसो राजबिराज पुगेका थिए, त्यहाँ चिकित्सकले काठमाडौं जान उनलाई सुझाएका थिए ।
सम्पैत काकालाई तत्कालै रकमको आवश्यकता थियो । उनी गाउँका धेरैसंग हारगुहार लगाए, कसैबाट तत्काल सहयोग पाएनन् । उता अन्नाज खरिदबिक्रि गर्ने व्यापारीको खोजी हुँदैथ्यो । त्यसैबीच उनको निधन भएछ ।
सम्पैत काकाको निधन पछि गाउँको चौक-चौराहा, घर-दलान, बाध-महार सबैतिर उनकै चर्चा चुलिएको थियो । ती मध्ये गाउँका बुद्धिया काकाको संवाद रोचक र घतलाग्दो थियो । उनी भन्दै थिए-
“…….संसारमा तीन किसिमका मानिस हुन्छन् : आयुर्वेदिक, एलोपैथिक र होम्योपैथिक ….!” (वरपर भेला भएकाहरूबीच सन्नाटा, सबै गम्भिर मुद्रामा )
मुसाफिर काकाले मौनता तोड्दै भनेछन्, ” बुद्धिया ! ई कि कह हँ …? (यो के भन्नु भएको हो ?) ।” बुद्धिया काकाले तीन किसिमका मानिसबारे बेलिबिस्तार गर्दै भनेछन्, ” …आयुर्वेदिकको मतलब -बोलचालमा धेरै राम्रो तर इमर्जेन्सीमा काम न आउने । एलोपैथिकको मतलब इमर्जेन्सीमा काम आउने तर, कहिले र के साइड इफेक्ट गर्छ, थाहै न हुने …! ( आकाशतिर हेर्दै ) होम्योपैथिकको मतलब -यो कुनै कामको त हुँदैन तर संगै रहँदा राम्रो लाग्छ ….।” त्यसपछि सबैजना गन्थन-मन्थन गर्दै आ-आफ्नो गन्तव्यतिर लागे । बुद्धिया काकाको भनाईपछि गाउँमा सम्पैत काकाको चर्चा हुनै छाड्यो । शायद उनले स्वार्थी मानिस र समाजको सही चित्रण गरी दिएकाले यसो भएको हुनुपर्छ ! तपाईं प्रतिक्रिया दिनुहोला । @दिनेश_यादव 2024-08-28 (#सामाजिक #साहित्य #साहित्यरत्न #नेपाली #literature #shortstory)
