” सब किमे बदलग्या “
” सब किमे बदलग्या ”
न्यारा होग्या खाणा सैं न्यारा पहराण
झोपड़ी की जगहां ईब फ्लैट बणग्या,
टाबर होग्या ईब टेम तैं पहलीं बड्डडा
म्हारा मां बापू आज मोम डैड बणग्या,
पहलीं कूद की आपां न पताशा खाया
लाड्डू शक्कर ईब स्वीट डेजर्ट बणग्या,
दूध, छाछ की जगहां कॉल्ड ड्रिंक्स आई
गुलगुला सुहाली ईब मोमोज बणग्या,
बैट गिंडी दबगी वीडियो गेम कै नीचै
खुला मैदान जिम की ट्रेडमिल बणग्या,
तख्ती आर स्याही ईब कूण मै लुहकगी
स्कूल का छोटा झोला ट्रॉली बैग बणग्या,
नानी की कहाणी सुणनो कोनी चाहवै
लोरी आर गीत सारा डी जे मैं खूग्या,
कोरड़ा आली होली पुराणी बात होगी
होटल की होली खातिर कुणबा छुट्टग्या,
मूंज आर संण की बणयोड़ी खाट टूटगी
जद तैं सबनै मखमली बैड भावन लाग्या,
बिजणा की हवा लागण लागी सै ताती
ईब तो एसी कूलर जादू चलाण लाग्या,
दादै कै खोआं की सवारी भी कोनी सै
गधा घोड़ा बैटरी आला खिलौना बणग्या,
दरख़्त आली छायां मै बैठा माणस कोनी
जानवरां का घोंसला डिजीटल बणग्या,
थाली मैं चूरयोड़ी बाजरै की रोटी कोनी
प्लेट कटोरी का नया चोंचला बणग्या,
आलथी पालथी मारकी रोटी कोनी खां
आरामदायक ईब डाईनिंग टेबल बणग्या,
अलबादी टाबर आजकाल सैं ए कोनी
सारा ए ईब शराफ़त का पुतला बणग्या,
घाघरा, धोती, कुड़ता आर खंडवा खुग्या
फैशन जीन्स, शर्ट आर प्लाजो बणग्या,
अलुणी घी आली महकार कोनी आवै
रोटियां न ईब बटर तैं चोपड़न लाग्या,
मीनू लिखरी आज आली आँख्या साथ
या के बणी इब तो सब किमे बदलग्या।
