ये बाबू कायल हो जइबअ…
ये बाबू कायल हो जइबअ…
■■■■■■■■■■■■■
दुनिया चली अइसन चाल
ये बाबू कायल हो जइबअ
सचको बतिया कहबअ
सुन ल घायल हो जइबअ
बाड़े सं रिश्वत खोर
तबे त पोसेले सं चोर
होखे द जवन होता
काहें करेलअ तू शोर
खींचे लागिहें सं खाल-
ये बाबू कायल हो जइबअ
सचको बतिया कहबअ
सुन ल घायल हो जइबअ
केहू लूट लूट के खाला
केहू कुर्सी पर सुस्ताला
खाली लउकत बा घोटाला
बाकिर मुहँ पर रहे ताला
खोलबअ त होई काल-
ये बाबू कायल हो जइबअ
सचको बतिया कहबअ
सुन ल घायल हो जइबअ
काम जवन सरकारी होता
साँचो बस बेगारी होता
बेवस्था जेतना कुल बाटे
येइमें रोज बीमारी होता
मत पूछअ तू येकर हाल-
ये बाबू कायल हो जइबअ
सचको बतिया कहबअ
सुन ल घायल हो जइबअ
विभागन के चोरी देखअ
बढ़ल कमीशनखोरी देखअ
जुटल बा चोरवन में नाता
टूटल ईमान के डोरी देखअ
पसरवलें सन ई जाल-
ये बाबू कायल हो जइबअ
सचको बतिया कहबअ
सुन ल घायल हो जइबअ
कुछे लोगवा के चानी बाटे
लउकत बस परेशानी बाटे
कंगालन के लूटे ले सन
ना शरम ना पानी बाटे
चाँपे सन ई माल-
ये बाबू कायल हो जइबअ
सचको बतिया कहबअ
सुन ल घायल हो जइबअ
सरकारी से काम चली ना
के बाटे जे हाँथ मली ना
बेचे ले सन राशन पानी
येकनी आगे दाल गली ना
करिये बा पूरा दाल-
ये बाबू कायल हो जइबअ
सचको बतिया कहबअ
सुन ल घायल हो जइबअ
अर्जी दी के कुछ ना पइबअ
सुन ल बाबू केतनों धइबअ
कर्मचारिन के कुछ ना होई
केतनो दुख आपन तू गइबअ
अधिकरिए बनिहें ढाल-
ये बाबू कायल हो जइबअ
सचको बतिया कहबअ
सुन ल घायल हो जइबअ
– आकाश महेशपुरी
