“ मैथिल क जादुई तावीज़ “
डॉ लक्ष्मण झा “परिमल ”
====================
गाम गेल रहि ! यज्ञ -परोजन छल ! साढ़ू क बेटा क विवाह ,सारक बेटा क विवाह ,उपनयन आ मुड़नक गहमा गमही रहल ! दू वरखक बाद रमन -चमन देखबाक भेटल ! कोरोना मुँहेटा मे नहि मास्क लगेबेलक अपितु सब कार्य स्थगित भ गेल छल ! बुझू अतिचार लागल छल !
हमर सासुर क दुमंठा चौक बद्द रमनगर लगैत छैक ! इ मिनी मधुबनी भ गेल ! पानक दुकान ,चाय दुकान ,मोबाईल रेपाइरिंग सेंटर ,स्कूटर दुकान ,दवाई आ छोट सन सब दिन साँझू पहर हाट सहो लगैत अछि ! पोखरक भीर पर स्कूल क ग्राउन्ड अछि ! किछु न किछु एहि ग्राउन्ड पर होइत रहैत अछि !
डुगडुगी ,ढोल ,संगीत क मधुर ताल हमरो आकर्षित केलक ! लोक कहि रहल छल “ चलू चलू जादू भ रहल अछि !” किछु देर मे लोकक जुटान होमय लागल ! समीप पहुँचि पता लागल इ मनोरंजनक प्रक्रिया अछि ! जहन नीक मजमा लागि गेल तखन प्रारंभ भेल मजमा !
वो अपने स्त्री -पुरुष , एकटा 12 वरखक लड़का आ दू टा बंदर ! पहिने डुगडुगी बाजल ,संगीतक महफ़िल जमल आ मैथिली लोक गीत सँ सब केँ मंत्रमुग्ध क देलक ! संगीतक धून बंद भेल डुगडुगीक आवाज गुंजित होमय लागल ! पहिने किछु बंदरक खेल देखेलक ,किछु ताश क खेल आ किछु कलाबाजी ! तकर बाद अपन बच्चा केँ चदर ओढा सुता देलक ! डुगडुगी बजबैत बच्चा सँ पुछलक———
“ जंबूरे ?”
“जी सरकार !“
“ जे पूछबो से बतेभी ?”
“ जी सरकार !“
हँसी -मजाक मे बहुतो प्रश्न पुछल गेल ! मुदा जादूगर बद्द तेज छल ! ओकरा त अप्पन “ तावीज “ बेचबा क छल ! डुगडुगी बजबैत वो कहलक —-
“ सरकार , आहाँ लोकनिक समक्ष हम एहि बच्चा केँ गर्दनि काटब ! आहाँ लोकनि हिलब नहि “
ताबैत हम आहाँलोकनि केँ एक दिव्य उपहार द रहल छी !
“ एकटा अद्भुत तावीज़ क आविष्कार भेल अछि ! इ तावीज़ चारि तरह क अछि !
“ प्रथम –—अपन मातृभाषा मैथिली धाराप्रवाह बाजब “
“ द्वीतीय -अपन माटि -पानि सँ प्रेम जागत “
“ तृतीय—–भाषा -लिपिक ज्ञान क वृद्धि आ “
“ चतुर्थ —-अपन लोग सँ मैथिलीये मे वर्तलाभ करब “
फेर डुगडुगी बाजय लागल ! जादूगर पुनः स्पष्ट केलक !
“ धैर्य राखू ,धैर्य राखू ! जिनका चाहि हुनका भेटतनि ! एकर दाम नहि फ्री मे ल जाऊ !”
मारि होमय लागल हाथों हाथ सब लुटि लेलनि !………………………………………….
घरे बाटे कियो किछु बेचयवाला डुगडुगी बजबैत चलि जा रहल छल आ हमर स्वप्न एहिना टूटि गेल !
=======================
डॉ लक्ष्मण झा “परिमल ”
साउंड हेल्थ क्लिनिक
एस ० पी ० कॉलेज रोड
दुमका,
झारखण्ड,
भारत
25. 04. 2022.
