मेरौ महान देस (ब्रज भाषा गीत)

🦚
मेरौ महान देश
०००००००००००
मेरौ भारत देश महान रे भैया भारत देश महान ।
आऔ करें वंदना याकी , महकें तन-मन-प्रान ।।
०
देश प्रेम ‌केे अक्षत अर्पण करकै कर लें वंदन ,
मेहनत की केशर कौ घिस कै भाल चढ़ावें चंदन ,
अभिनंदन याके वीरन कौ है गये जो कुर्बान ।
मेरौ भारत देश महान ।।१
०
बीन-बीन कै आँगन ते याके काँटे चुन लावें,
याकी वेदी पै हरियाली के हम फूल चढ़ावें ,
याके साँचे भक्त हैं भैया , खेतन खड़े किसान ।
मेरौ भारत देश महान ।।२
०
फटी चुनरिया फेंक नेह की ‌न‌ई ओढ़नी लाऔ,
मन की बाती बटौ एकता कौ नव दीप जराऔ,
हँस कै चरनन सीस चढ़ावें, याके वीर जवान ।
मेरौ भारत देश महान ।।३
०
महकै केसर क्यारी घर-घर कन्या पुजै कुमारी,
अद्भुत अलबेली देवी है भारत मात हमारी,
गूँधें नव जयमाल थिरकिहों ओठन पै मुसकान ।
मेरौ भारत देश महान ।।४
🌹
महेश जैन ‘ज्योति’,
मथुरा ।
***
🌿🌿🌿