माई
माई
सबका के दुनिया दिखावेली माई
धरती पर सबके लिआवेली माई
कौनो औलाद जनमावे से पहिले
दुनिया के पीरा उठावेली माई
भलहीं उपवास – ढ़ाँस करेली अपने
बचवन के सुबहित खियावेली माई
अपने काटस दिन फटही लुगरिया में
नन्हकन के नीक पहिनावेली माई
अचिको लगत चोट अपना लड़िकवन के
घइली भर नीर ढरकावेली माई
लइकन के चाहेली हाकिम बनावल
हिम्मत भर अपना पढ़ावेली माई
बेटा बियाह करे निकलेलें घर से
मुठिया से रुपिया लुटावेली माई
सुई से सागर ले बिटिया विदाई
खातिर सामान जुटियावेली माई
बेटा पतोह देत बाड़ें गजन तबो
अनघा आशीष बरसावेली माई
जबले जियस तबले सेवा काइल जाउ
मुअला पर ना फेरु आवेली माई
मुअला पर टूअर बना देली अवधू
मोन परि – परि के रोआवेली माई
अवध किशोर ‘अवधू’
मोबाइल नंबर 9918 85 4285
