मउगी ओकर (हास्य कविता)
मउगी ओकर (हास्य कविता)
■■■■■■■■■■■■■
ऊ तऽ हउवे बहुते भोला
मउगी ओकर धधकत शोला
छुवते ओकर जीव जरेला
प्रेम करे तऽ बजर परेला
जरे आँख बीखी के मारे
खिसिआले तऽ दुनिया हारे
माँगे बीखो सौ सौ तोला-
मउगी ओकर धधकत शोला
बोलेले धमकउवा बोली
जइसे बोले बम आ गोली
गुरनाले आ परे काटे
हड़िया पतुकी रोज उलाटे
बन जाले आगी के गोला-
मउगी ओकर धधकत शोला
कान बंद आ मुँहवा जारी
हवे गाँव के छटुआ नारी
भोपू बन के देले हरदम
एके साँसे एतना गारी
मार-पीट अब रोजो होला-
मउगी ओकर धधकत शोला
कहबऽ तऽ बहुते ऊ चींड़ी
पीयेले गाँजा आ बींड़ी
गुटखा, सुर्ती खाले रोजे
कहियो कहियो दारू खोजे
योइमे डाले पेप्सी, कोला-
मउगी ओकर धधकत शोला
मुर्गा-मछरी जम के चापे
एक डेग में छौ फुट नापे
आँख तरेरे कूँचे माहुर
रोज सुनावे नीमन बाउर
चिधरे अइसन काँपे टोला-
मउगी ओकर धधकत शोला
खाना दे के ओरहन देले
मुँहझउँसा ऊ रोज कहेले
कहेले पेरले बा घरी
डाटे तऽ नाचेले फरी
मरदा तऽ फेकेला चोला-
मउगी ओकर धधकत शोला
– आकाश महेशपुरी
