बरबाद हो जइबS

भोजपुरी गज़ल

केहू के देखि के जरबS , त तूँ बरबाद हो जइबS
केहू के हक अगर मरबS ,त तूँ बरबाद हो जइबS

चली डेगाँ कहS केगाँ , कहीं लेगाँ लगवला से
अधम एगाँ करम करबS , त तूँ बरबाद हो जइबS

रहS पकिया , बनS फरहर , जमो पकिया ,फरहरन से
फिड़ारन के सँघँत धरबS , त तूँ बरबाद हो जइबS

पढ़े के बा उमिरि पढ़िलS , अबे चिरई फँसावS मति
अखरखन ढेर जो करबS , त तूँ बरबाद हो जइबS

अगर शादीसुदा बाड़S , मरS धनिया के झुलनी पर
पड़ोसन पर नज़र मरबS , त तूँ बरबाद हो जइबS

डरो ऊ काम तहरा से , सकरलS तूँ जवन अवधू
खुदे ओ काम से डरबS ,त तूँ बरबाद हो जइबS

अवध किशोर ‘अवधू’
मोबाइल नंबर 9918854285
दिनांक 30-06-2024