“ प्रतिक्रिया ,समालोचना आ टिप्पणी “
डॉ लक्ष्मण झा “ परिमल “
=============================
प्रतिक्रिया सकारात्मक ,विषय संबंधित ,तथ्यपूर्ण ,रोचक ,सुंदर सब केँ नीक लगैत छैनि ! गप्प एहिठाम आबि केँ नहि रुकैत अछि ! कखनो -कखनो समालोचना ,टिप्पणी ,हिदायत आ कटाक्ष केँ प्रतिक्रिया क सामना सेहो करय पड़ैत छैक ,जे स्वभावतः असहज प्रतीत होइत अछि !
प्रायः -प्रायः एहन असहज भंगिमा हमरा लोकनि केँ राजनीति विषय क परिवेश मे विशेषतः भेटत ! सभक क विचारधारा अलग -अलग होइत अछि ! अधिकाशतः कर्कश वातावरण क श्री गणेश भ जाइत अछि ! मित्रता क भित मे दरार पड़’ लगैत छैक ! हम तंग भ केँ हुनका “ ब्लॉक “ क दैत छियनि आ कखनो -कखनो “ अनफ्रेंड “ क दैत छियनि ! आखिर सब काज केँ छोड़ि कहिया धरि विवाद मे फँसल रहब ? डिजिटल मित्रता क युग मे हम नहि छी त कियो आर छथि ! एकटा बात त गिरह बाँधि लिय कि “ समान विचारधारा “ क लोक एक संगे रहि सकैत छथि जे डिजिटल मित्रता क मूल मंत्र अछि !
साहित्यिक परिचर्चा मे समलोचना त होइते अछि आ टीका -टिप्पणी सेहो होइत छैक ! परंच इ समलोचना आ टीका -टिप्पणी शालीनता ,शिष्टाचार आ माधुर्यता पर अधिकांशतः अविलंबित रहबाक चाहि ! किछ हमरा बुझ’ पड़त आ किछ हुनका बुझ’ पड़तनि ! अधिकाशतः लोक त किनको लेखनी केँ पढ़ितो नहि छथि त समालोचना क प्रश्न कतय सँ उत्पन्न हेत ? कते लोक देखि केँ आ पढ़ि केँ अपन मुँह फेरि लैत छथि ! तथापि हम हिनका लोकनि केँ अपना हृदय मे सम्हारि केँ रखैत छी !
तेसर प्रकारक लोक बद्द दिव्य ग्रह क प्राणी लगैत छथि ! हुनकर प्रतिक्रिया सेहो विचित्र होइत छैनि ! आहाँ राजनीति विषय मे लिखु ,साहित्यिक लेख ,कविता ,व्यंग्यात्मक आ विश्व क समस्त विषय मे किया नहि लिखु मुदा इ विचित्र ग्रह क प्राणी क समालोचना सँ आहाँ आहत त भइये टा जायब ! आहाँ किछु लिखु ,कोनो फोटो वा तस्वीर पोस्ट क दिओ ! आहाँ क उपलब्धि हुये वा आहाँ दुख सँ पीड़ित छी तकर कोनो मतलब नहि ! विचित्र ग्रह क प्राणी लोक क कमेन्ट केँ ध्यान सँ देखु आ पढू :–“ जय हो “—-“जय श्री राम “—“जय मिथिला “—-“जय हनुमान “ —इत्यादि -इत्यादि !
यथार्थतः एहन नारा क महत्व धार्मिक अनुष्ठान क लेल अतिउत्तम अछि मुदा एहि सभ क प्रयोग इ विचित्र ग्रह क प्राणी प्रत्येक स्थान पर करैत रहैत छथि ! हिनका कनिकबो नहि आभास होइत छनि जे के -के एहि सँ आहत होइत छथि ?
सब अपन -अपन स्थान पर जे छथि से छथिये परंच एहि बात केँ हम कखनो अस्वीकार नहि क सकैत छी जे हमरा लोकनि जे कोनो अपन प्रतिक्रिया ,समालोचना आ टीका -टिप्पणी सोशल मीडिया पर करि त वो यथायोग्य आ सटीक करि अन्यथा हमरो कियो स्वीकार नहि करताह !
====================
डॉ लक्ष्मण झा ” परिमल ”
साउंड हेल्थ क्लिनिक
एस ० पी ० कॉलेज रोड
दुमका
झारखंड
भारत
15.08.2022
