चैती

चहकेला घरवा दुआरवा हो रामा
अइलें सजनवाँ

रचि रचि धनिया भोज बनवली
सोने के थाल में जेवना सजवली
जेवेलें बारहों बिजनवाँ हो रामा
अइलें सजनवाँ

बाल गोपाल संघे फुलवो फुलाइल
पेन्ही के पियारिया मन अगराइल
निरखे ले सइंया सेजरिया हो रामा
अइलें सजनवाँ

पोरे पोरे प्यार सजन बरिसावेलें
ललका गुलाब मोरे जुड़ा में लगावेलें
मारेले तिरछी नजरिया हो रामा
अइलें सजनवाँ

चहकेला घरवा दुआरवा हो रामा
अइलें सजनवाँ

गणेश नाथ तिवारी”विनायक”