आह्वान पढ़ने का (ब्रज भाषा गीत)

आह्वान पढने का
०००००००००००००
पढ़वे में काहे घबराऔ ,
लिखवे में काहे सरमाऔ , सुनौ हमारी रे ।
अब तौ हाथन में थामौं ,कलम ‌दुधारी रे ।।
०
अनपढ़ कौ जीनौ कहा जीनौ , मन में तनक विचारौ ,
अनपढ़़ लागै जैसै छोरा बूढ़ौ है जाय क्वारौ ,
वाकूँ कबहु अकल नाय आवै ,
यौं ही बीत उमरिया जावै,
वाकी सारी रे ।
अब तौ हाथन में थामौ कलम दुधारी रे ।।(१)
०
छोरी के हाथन में चिट्ठी कौने नें सरमावै ,
कहा लिखी‌ बलमा नै कैसै दूजे पै बचवावै ,
ठाड़ी-ठाड़ी मन पछतावै ,
सोचै सिकुचावै झिर्रावै ,
होवै ख्वारी रे ।
अब तौ हाथन में थामौ कलम दुधारी रे ।।(२)
०
जानै पढ़ लिये ढाई आँखर ,ऊ ही पंडत ज्ञानी ,
वाकी बात न गिरै सभा में, हर काई नै मानी ,
इतनी बात हमारी मानौ ,
अब तौ त्यागौ अनपढ़ बानौ ,
कहा लाचारी रे ।
अब तौ हाथन में थामौ कलम दुधारी रे ।।(३)
०
गाम-गाम मेंं गली-गली में , एक-एक बाखर में,
दीयौ लै कै हाथन ढूँढ़ौ , अनपढ़ कूँ हर घर में,
यामें टका न लगै तिहारौ ,
सीखौ कागद करनौ कारौ ,
बैठ अटारी रे ।
अब तौ हाथन में थामौ कलम दुधारी रे ।।(४)
०
चौपारन पै चरचा करकै , न‌ई चेतना लाऔ ,
सब हिल-मिल कै चलौ , ज्ञान की घर-घर ज्योति जराऔ ,
मावस्या कौ ई अँधियारौ ,
भाजै दूर होय उजियारौ ,
मनै दिवारी रे ।
अब तौ हाथन में थामौ कलम दुधारी रे ।।(५)
०००००