आँसू वही...!

. पूर्णिका ०००८

प्रारम्भी नेह:-
कतरा कतरा ई अखियाँ से आँसू बही।
तोहार दुःखवा दरदवा सब आँसू गही।।

जवन हियरा पर तोहरो लगल घाव बा।
ओकर सकले सबुतवा बन आँसू रही।।नेह:-१।।

खून खाकर के चोटवा त जम जायेला।
धोखा खा करके बहे वाला आँसू सही।।नेह:-२।।

केतना दर्द निशानी बन मिलल बा हमें।
हम्मर श्रृंगार दुनिया के ई आँसू कही।।नेह:-३।।

सूखत जाई भले ही पोखरा तालाब सब।
लेकिन अँखिया ठिकाना बन आँसू ठही।।नेह:-४।।

खाली रोअला पे ना खुशियों में आवेला।
कबो बन जाला मोतियो जा आँसू यही।।नेह:-५।।

जवन जीव क दुःख से दुखी होला मन।
ऊहे मनवा सरल ह सच्चा आँसू वही।।नेह:-६।।

परिचयी नेह:-
सागर महला से अमृत त मिलल देव के।
मिली ओके सुधा जे “चिद्रूप” आँसू मही।।
__________________________________________
©️®️ पूर्णिका-कार :- पाण्डेय चिदानन्द “चिद्रूप”
(सर्वाधिकार सुरक्षित १०/०९/२०२५)
__________________________________________