مستان میاں

تاج محل کا راز بتا کر خوب ہنسے مستان میاں
مردہ دلوں میں آگ لگا کر خوب ہنسے مستان میاں

زور زبر سے عشق نہ ہوۓ ، راج نہ ہوئے زور زبر
لال قلعہ کو آنکھ دکھا کر خوب ہنسے مستان میاں

فکر کسے جو راہ دکھاۓ لوگ بھٹکتے روز یہاں
بارہ دری میں راہ دکھا کر خوب ہنسے مستان میاں

نام جپن پر زور نہیں پر نیک چلن پر زور دیا
رنگ محل کو آگ لگا کر خوب ہنسے مستان میاں

راج بھون کی شان بڑھی یا شان گھٹی معلوم نہیں
راج بھون میں رنک بٹھا کر خوب ہنسے مستان میاں

پیر پیمبر ایک نہ دیکھا دین دکھی پر دھیان دیا
زندہ بتوں کو دودھ پلا کر خوب ہنسے مستان میاں

گاؤں سے جب سے شہر میں آۓ رنگ دکھائیں روز نیا
چور گلی میں شور مچا کر خوب ہنسے مستان میاں

شیو کمار بلگرامی