· Reading time: 1 minute

कुसीनगर के माटी

हउवे भोजपुरिया खाँटी जिला कुसीनगर के माटी
जे बुद्ध नगरिया आई दुनिया में सनेहिया बाँटी

कुस के बसावल कुसीनगर नाहीं परती
बाबा अज्ञेय जी के हवे जनम धरती
इहवाँ जे आवे बिना मोल के बिकाला
हियरा से मान सम्मान ऊ दियाला

पहुना के देवता मानल एहिजा के हवे परिपाटी

बुद्ध भगवान के असीस बा सहाई
रहिया देखावें खन्हवारे वाली माई
धाम रामकोला जा के जियरा जुड़ाला
कुलकुला मैनपुर में मन मुस्कियाला

गण्डक नरायनी तीरे जे आई पिरितिया साटी

बाड़ी पड़रौना में आसीन माई हट्टी
निकरल सुरुज देव बाने तुरुकपट्टी
बनि के कुबेरनाथ भोले बाबा साजें
सोनमती माई बेदूपार में विराजें

सरधा ले के अइला पर देली सब दुखवा छाँटी

काला नमक बासमती धान उपजेला
ऊँखियन के रसवा में नेहियो बसेला
खोउवा के खुरमा मिलेला हाटा-कसया
भेली सुकरौली के मेटावे हर समसया

बोलियो से झरी मिठाई जब महिया रबवा चाटी

बंचरा-करमहा के बाति का उचारीं
सिद्ध पीठ मानल जाला मठ दूनूँ भारी
बघवन से दँवरी करावत रहनें बाबा
इहवें हमार हउवे कासी अउरी काबा

जब जब ‘असीम’ घबड़ाई धीरज से दिनवा काटी

© शैलेन्द्र ‘असीम’

2 Comments · 59 Views
Like
Author
12 Posts · 568 Views
शैलेन्द्र कुमार पाण्डेय उपाख्य : 'असीम' माता : स्व. द्रौपदी पाण्डेय पिता : स्व. सूर्यभान पाण्डेय पत्नी : श्रीमती प्रिया पाण्डेय पुत्रियां : श्रेया नव्या तन्वी शिक्षा : एम.एस-सी., बी.एड.,…

Enjoy all the features of Sahityapedia on the latest Android app.

Install App
You may also like:
Loading...