बुंदेली दोहा प्रतियोगिता-157 से चयनित दोहे संयोजन- राजीव नामदेव ‘राना लिधौरी’
157 बुंदेली दोहा प्रतियोगिता-157
बिषय-“पैलाँ ,पैलें (पहले) दिनांक-30-3-2024
संयोजक- राजीव नामदेव ‘राना लिधौरी’
आयोजक- जय बुंदेली साहित्य समूह टीकमगढ़
प्राप्त प्रविष्ठियां :-
1
गय पैलाँ ससुरार में,भव स्वागत सतकार।
बेर-बेर जब जाय जो,लयँ हसिया उर जार।।
***
-शोभाराम दाँगी, नदनवारा
2
पैलाॅं लंबोदर सुमर,दूजैं शारद माइ।
तीजैं गुरु की वंदना,चौथें बाप मताइ।।
***
-भगवान सिंह लोधी’अनुरागी’ हटा
3
पैलां सें ठाडे इतै,बेशरमी सें आप।
बिन बुलाय ही आ गये ,रसता लो तुम नाप।।
***
-वीरेन्द्र चंसौरिया ,टीकमगढ़
4
पैलउं कैंकइ सें मिले,राम अजुद्या आय।
बिबिध भांति समझाय कें, दीन्ही ग्लानि मिटाय।।
***
-सुरेश तिवारी, बीना
5
परकम्मा दइ भाव से , शिव गौरा खौं घेर |
पैलाँ पूजै गनेश जू , सबरै रै गय हेर ||
***
-सुभाष सिंघई , जतारा
6
-पेलऊँ पेल को बोलबो,दिल मे घर कर जात।
हेरन हँसन इशारे करवो, न चैन में जो जी रात।।
***
-विद्याशरण खरे, नौगांव
7
पैलाँ माँगें प्रेम सें, हाँत जोर कें बोट।
फिर मारें पुचकारकें,बे अन्तस में चोट।।
***
-डां.देवदत्त द्विवेदी, बड़ामलहरा
8
रावण नें खुद जान कैं ,पैलाॅं करी ॳॅंगाइ ।
पथरा पटकौ पाॅंव पै ,हरकैं नारि पराइ।।
***
-आशाराम वर्मा “नादान ” पृथ्वीपुर
9
पैलाॅं पैलें हम गये, होरी पे ससुरार।
सारी सारे मिल जुरै, खूब रंग दव यार।।
***
-रामेश्वर प्रसाद गुप्ता इंदु.बडागांव,झांसी
10
पैलाँ दुनिया में हतौ,सबखों सबसें प्यार।
हो गय ई कलकाल में,सब मतलब के यार।।
***
– अंजनी कुमार चतुर्वेदी, निबाड़ी
11
घूँघट पैलाँ सिर हतौ,ती आँचर की छाँव।
नैचे नैना नार के,नीकौ लगतो गाँव।।
***
-प्रदीप खरे मंजुल,टीकमगढ़
12
पैलाँ गय ससरार सो ,भय भोजन सत्कार ।
दार भात रोटी कड़ीं ,पापर बरा अचार ।।
***
– प्रमोद मिश्रा, बल्देवगढ
13
पैलें जपलो भुनसराँ,अपने प्रभु को नाव।
काम सबइ बन जात हैं,कभउँ न रात अभाव।।
***
-श्यामराव धर्मपुरीकर ,गंजबासौदा,विदिशा
14
उठत भोर सियराम खों,पैलाँ शीश झुकाव।
जो जीवन जी ने दओ,ऊ के नित गुन गाव।।
***
डां.बी.एस.रिछारिया, छतरपुर
15
पैलां कर हरि कौ भजन, और करौ सत्संग।
नित नियम साधना करौ,रहै न देह कुसंग।।
***
-रामानन्द पाठक नन्द,नैगुवां
16
पैलो वंदन माइ खों,दूजो प्रभु के नाम।
रिद्धि सिद्धि पायें विपुल, सफल होंय सब काम।।
***
आशा रिछारिया जिला निवाड़ी
17
पैलाँ डारे पोइया,फिर बालम भरमाय।
अपनौ उल्लू साद कै,चूना हमें लगाय।।
***
एस. आर. सरल,टीकमगढ़
18
पैलाँ जु़र-मिल एक सँग, मनत हते त्योहार।
मन में बचो न प्रेम अब,भय एकल परवार।।
***
– अमर सिंह राय, नौगांव
######
