सापटी
सापटी (#लघुकथा👇)
#ग्रामोधार_काका : भरोसीया ! तिमीले लिएको सापटी रकम कहिले फर्काउँछौ ? धेरै दिन भै-सक्यो त …?
#भरोसीया : छोराले विदेशबाट आफ्नो कमाई पठाएको छैन ! उताबाट आउने बित्तिकै हजूरलाई फिर्ता दिन्छु ।…..
(छ महिना पछि ग्रामोधार काका फेरी सापटी रकम माग्न पुग्छन् ।)
#ग्रामोधार_काका : खै त ! ६ महिना भै सक्यो, अझै तिम्रा छोराले विदेशबाट पैसा पठाएको छैन, भरोसीया ? …..
#भरोसीया : (केही बेर नसुने झै गर्दै) ….छैन पठाको । पऽऽठाऽऽको…भए त फिर्ता गरि हाल्थे नि ।
#ग्रामोधार_काका : झुठ न बोल न ! समतोलियाको आमा (भरोसीको पत्नी) दुई दिनअघि मात्र काकीसंग बैंकको चेकबुक भराउन(लेखाउन) गएकी थिइन भनेर मेरो कानमा आएको छ ।… (मधेशतिर निरक्षरहरूले पढेलेखेकाहरूसंग चेकमा नाम र रकम लेखाउने चलन छ ) । भरोसीया निधारमा ह्वार्र-ह्वार्ती आएको पसिना पुछ्दै ।
#भरोसीया : काका ! सत्य थाहा पाइ हाल्नु भयो । हो…उताबाट केही रकम छोराले पठाएकै हो, त्यो रकमबाट समतोलियाको आमाको गहना बन्धकी छुटायौं । अब रकम आएपछि तपाईलाई नै दिने हो ।
(अर्को छ महिना पछि ग्रामोधार काका फेरी सापटी रकम माग्न पुग्छन् । )
#ग्रामोधार_काका : खै त ! अझै तिम्रा छोराले पैसा पठाएको छैन, भरोसीया ? म बिरामी छु, तिम्रो काकी बिरामी हुनुहुन्छ, औषधीमुलोमा हाम्रो खर्च बढेको छ । तेलनुन, लुगाफाटो पनि किन्नुछ, नातीहरू बाहिरबाट आउँदैछन्, तिनीहरूमा पनि केही खर्च गर्नुपर्छ…….! ( काकाले आफूलाई रकम चाहिनुको कारणबारे बेलिविस्तार लगाउँदै थिए ) । त्यसै बीचै झगरू चाचाको प्रवेश हुन्छ । उनले ग्रामोधार काकाको कान नजिकै गएर केही कुरा सुनाउँछन् । उनको जिब्रोले मि…ट…र…ब्या…जी…को उच्चारण गरेको जस्तो देखिन्थ्यो । झगरूको प्रस्तुति शैली हाकाहाकी त्यसैको पुस्टि गर्ने खालको थियो । त्यसपछि त्यहाँ निकै बेर एक प्रकारको सन्नाटा र मौनता छायो । (केही समयपछि )
#झगरू_चाचा :(ग्रामोधार काकालाई हेर्दै) ….कस्तो जमाना आएछ ? आफैले दिएको सापटी रकम माग्दा पनि आफूलाई त्यो रकम किन चाहियो भनेर बताउनु पर्छ । अझ के-कुन्नी ब्याजी को नाममा प्रताडित समेत हुनुपर्छ ? … बडा दशा बा..! ●~#दिनेश_यादव●~
