“ मैथिली क अवहेलना “

डॉ लक्ष्मण झा “ परिमल “
==============================

सूचना प्रसारण क क्षेत्र मे हमरा लोकनि अद्भुत प्रगति केने जा रहल छी ! अन्वेषण पर अन्वेषण कयल जा रहल अछि ! आइ कंप्युटर ,मोबाईल आ लैपटॉप वरदान सिद्ध भ रहल अछि ! एक क्षण मे बुझु सम्पूर्ण विश्व सं जूडि जाऊ ! नव -नव लोकनि सं मित्रता बना लिय ! साक्षात वीडियो कॉलिंग करि महाभारतक संजय बनि जाऊ ! टाइप करू ,भाषा सिखू ,अनुवाद करू ,गल्ती सुधारू आ विश्व क समस्त समाचार सं अवगत भ जाऊ ! पुरनका मित्र सं भेंट भ जाइत अछि ! गुरुदेव क सानिध्य पुनः प्राप्त भ जाइत अछि ! आर कतैक गुणक बखान हम करब ? पुरनका लोकनि केँ एकर महत्व बुझि पड़लनि ! आब एकर उपयोग बरिष्ट लोकनि सहो करैत छथि ! आ जे पछुआयल छथि सहो आब व्यग्र छथि !

किछु दिन पहिने हमहूँ सिखलहूँ ! बड़ उपयोगी यंत्र अछि ! आब त बुझु एकरा बिना किछु नहि ! आर त आर इ हमर पथप्रदर्शक बनि गेल ! एतैक कहाँ लिखइत छलहूँ ? आब अंग्रेजी लिखइत छी ,हिन्दी लिखइत छी ,मैथिली लिखइत छी ,मिथिलाक्षर सिखइत छी आ बांग्ला सहो सिखबाक प्रयास करैत छी ! ज्ञानक आलोक एहि यंत्र सं भेटल ! विश्वक समस्त भाषा केँ हम सम्मान दैत छी आ सिखबा क चेष्टा सहो करैत छी ! मुदा मैथिली भाषा सम्पूर्ण देहक रक्त मे प्रवाहित भ रहल अछि ! जतैक सहजता ,आत्मीयता आ आनंद हमरा अप्पन भाषा मैथिली मे भेटैत अछि आन भाषा मे नहि !

मुदा मैथिली भाषा तीव्र गति सं आगु नहि बडि रहल अछि ! अधिकाशतः मैथिल जे प्रवासी भ गेलाह ! हुनकर अवहेलना क शिकार मैथिली भ रहल अछि ! भाषा सं विरक्ति समाज ,सभ्यता आ संस्कृति सं विरक्ति स्वाभाविक छैक ! हमरा लोकनि इ भ्रम पालि लेने छी जे कनियाँ ,बच्चा सब आ स्वयं अप्पन भाषा अपना मे बाजब त लोक मूढ़ बुझत ! नाटकीय रुपेण कोनो मैथिली सुअवसर पर मिथिला परिधान सं अलंकृत भेने सं मैथिली संरक्षक नहि बनि सकैत छी !

बहुतो दशक सं मिथिला राज्य परिकल्पना केल जा रहल अछि ! हम इ कथमपि नहि कहब जे एहि दिशा मे काज नहि भ रहल अछि ! मुदा हमरा लोकनि जड़ि छोड़ने जा रहल छी आ ठारि पर विशेष ध्यान देने जाइत छी ! मिथिला मे प्रायः अनुमानतः 20 % लोकनि मिथिला लिपि लिखइत हेता आ पढ़ि सकैत हेता ! एहि मे मिथिला पछुआयल अछि ! सूचना प्रसारण क क्षेत्र मे एक सं एक मैथिल महारथी छथि ! मुदा आइ धरि गूगल मे मिथिला लिपि केँ स्थान नहि दिया सकलाह ! अकर्मण्य त बुझु हम सब सहो भ गेल छी !

===================
डॉ लक्ष्मण झा ” परिमल ”
साउंड हेल्थ क्लिनिक
डॉक्टर’स लेन
दुमका
झारखण्ड
भारत