देश के नौजवान
हमके इज़्ज़त से जीए के
अधिकार चाही सुन लअ
हम देश के नौजवान हईं
रोज़गार चाही सुन लअ…
(१)
हिंदू-मुस्लिम के नाम पर
आख़िर कबले भरमइबअ
मंदिर-मस्जिद के नाम पर
आख़िर कबले भड़कइबअ
आपस में कवनो लफड़ा
ना बेकार चाही सुन लअ
हम देश के नौजवान हईं
रोज़गार चाही सुन लअ…
(२)
जे पंचायत से संसद ले
सबका खातिर काम करो
शिक्षा औरी स्वास्थ्य के
खूब नीमन इंतज़ाम करो
जनता जेइमें खुश रहे ऊ
सरकार चाही सुन लअ
हम देश के नौजवान हईं
रोज़गार चाही सुन लअ…
(३)
तू खाद औरी बिजली दअ
खेत औरी खलिहानन के
चारू ओर अंबार लगा दअ
मील औरी कारखानन के
एगो सस्ता औरी अच्छा
बाज़ार चाही सुन लअ
हम देश के नौजवान हईं
रोज़गार चाही सुन लअ…
#Geetkar
Shekhar Chandra Mitra
#राजनीतिक #कविता #चुनावी #बगावत
#चुनावी #शायरी #सियासी #इंकलाब
#अवामी #जनवादी #भोजपुरी #गीतकार
#कवि #बेरोजगारी #महंंगाई #भ्रष्टाचार
#Youth #jobs #lyricist #singer
