عظمت رسول کی
ظاہر ہے اس سے دیکھئے عظمت رسول کی
شاہی خدا کی ہے تو وزارت رسول کی
جو شخص مانتا ہے ہدایت رسول کی
جنّت میں جائے گا وہ بدولت رسول کی
الله جانےحشر میں ہو ان کا حشر کیا
کہتے ہیں جو کہ کیا ہے ضرورت رسول کی
دينِ خدا کے واسطہ گھر بار چھوڑ دے
دیتی ہے درس آج بھی ہجرت رسول کی
محفل سجی ہے خوب محمّد کے نام کی
خوابوں میں آج ہوگی زیارت رسول کی
ارشدؔ تری زبان پہ نعتِ نبی ہے آج
تجھ پر ہوئی ہے نظرِ عنایت رسول کی
ارشدؔ رسول بدایونی
